Андижон вилоятида аҳолини электр энергияси билан узлуксиз таъминлаш, беҳуда сарфланишларни қисқартириш мақсадида кенг қамровли ўрганиш ишлари амалга оширилмоқда. Хусусан, Булоқбоши туманида 160 минг нафар аҳоли ва 31 мингдан зиёд истеъмолчи мавжуд бўлиб, 37 та маҳалла фуқаролар йиғинидан 8 таси «қизил» тоифага киритилгани муаммонинг долзарблигини кўрсатди.

— Тузилган 7 та ишчи гуруҳи томонидан хонадонма-хонадон ўрганишлар олиб борилиб, 20 дан ортиқ уйда ҳисоблаш ускуналарини кўчага чиқариш, 3 та трансформаторни таъмирлаш каби амалий чоралар кўрилди, — дейди туман ҳокими Фурқатбек Бўтахонов. — Шунингдек, «Қақир» ва «Ширмонбулоқ» маҳаллаларида трансформаторлар ташқи салбий таъсирлардан ҳимоя қилинди. Туман миқёсида давом этаётган бундай ёндашув фақат муаммони қайд этиш эмас, балки уни жойида ҳал этишга қаратилгани билан аҳамиятли бўлмоқда.

Мазкур жараёнлар доирасида вилоят миқёсидаги таҳлиллар ҳам муаммонинг кенг қамровли эканини кўрсатди. Салкам 900 та маҳалланинг 320 тасида юқори йўқотишлар кузатилаётгани, 40 йилдан зиёд хизмат қилган 2400 дан ортиқ трансформаторлар мавжудлиги аниқланди. Буни бартараф этиш мақсадида 71 та ишчи гуруҳи тузилиб, 362 нафар мутахассис 8000 дан ортиқ трансформаторларни таъмирлаш ишларига жалб этилди.

Саминжон ҲУСАНОВ, «Халқ сўзи».