Олий Мажлис Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси ўринбосари Одилжон Маматкаримов томонидан Наманган вилояти Уйчи туманида аҳоли учун навбатдаги сайёр қабул ташкил этилди.

Қабул давомида фуқаролардан 15 дан ортиқ мурожаатлар келиб тушиб, уларнинг аксарияти ички йўлларни ободонлаштириш, хотин-қизлар бандлигини таъминлаш ҳамда «Оилавий тадбиркорлик» дастури доирасида имтиёзли кредитлар ажратиш масалаларига оид бўлди. Ушбу мурожаатларнинг 10 таси жойида ижобий ҳал этилди.

Муддат талаб қиладиган масалалар юзасидан эса тегишли ташкилот ва идоралар масъулларига тегишли кўрсатмалар берилди, уларнинг ижроси қатъий назоратга олинди.

Шунингдек, учрашув давомида аҳоли билан очиқ мулоқот ўтказилиб, фуқароларга мамлакатимизда амалга оширилаётган ислоҳотлар, янги қонунчилик ташаббуслари ҳамда давлат дастурларининг мазмун-моҳияти ҳақида тушунтиришлар берилди.

Таъкидланганидек, бундай сайёр қабуллар фуқароларнинг муаммоларини ўз вақтида ҳал этиш, уларнинг яшаш шароитини яхшилаш ҳамда давлат органлари фаолиятининг очиқлиги ва самарадорлигини таъминлашга хизмат қилади.