Россия 2 июндан бошлаб Арманистондан данакли мевалар ва узум олиб киришга вақтинчалик чекловлар жорий этмоқда, деб хабар беради «Россельхознадзор» матбуот хизмати.

Тақиқ остига олча, гилос, ўрик, олхўри, шафтоли, шунингдек, узум тушди. Чекловлар Арманистондан чиққан ва у ердан жўнатилган маҳсулотларга, шунингдек, уларнинг Россия ҳудуди орқали Евроосиё иқтисодий иттифоқига (ЕОИИ) аъзо бошқа давлатларга транзитига ҳам тааллуқлидир.

«Россельхознадзор» Арманистон меваларини Россияга етказиб беришда қоидабузарликлар тез-тез содир бўлаётганини қайд этмоқда. «Россельхознадзор» Арманистон томонига карантиндаги маҳсулотларни етказиб беришда ЕОИИга аъзо давлатлар учун карантин остида бўлган объектлар (зараркунандалар/касалликлар) аниқлангани билан боғлиқ қоидабузарликлар ҳақида бир неча бор маълумот юборган», — дейилади хабарда.

Россия идорасининг ҳисоблашича, қоидабузарликларнинг тез-тез такрорланиши Арманистон Қишлоқ хўжалиги вазирлигининг тугатилиши оқибати бўлиб, шундан сўнг ваколатлар Иқтисодиёт вазирлиги зиммасига юкланган эди. «Россельхознадзор»нинг фикрича, Арманистон Иқтисодиёт вазирлиги таркибий муаммоларга дуч келмоқда ва ўзига юкланган вазифаларни уддалай олмаяпти.

«Юзага келган вазият Россия ва ЕОИИ ҳудудининг фитосанитария осойишталигини, шунингдек, Россияда саноат боғдорчилиги, мевачилик ва узумчиликни давлат томонидан қўллаб-қувватлаш дастурларининг амалга оширилишини хавф остига қўймоқда», — дейилади хабар матнида.

«Россельхознадзор»нинг тушунтиришича, чекловлар жўнатилаётган маҳсулотлар хавфсизлигини таъминлаш бўйича алгоритм ишлаб чиқилгунга қадар амалда бўлади.

Сўнгги кунларда «Россельхознадзор» Арманистондан Россияга кўплаб маҳсулотларни, жумладан, қулупнай, кўкатлар, бодринг, помидор, қалампир, шунингдек, коньяк ва винонинг бир нечта брендларини олиб киришни тақиқлаб қўйган эди.