Мактабгача ва мактаб таълими вазири Эъзоза Каримова Тошкент шаҳар бошқармаси ҳамда туман бўлимлари раҳбарлари билан ишчи учрашув ўтказди.

Мулоқот марказида пойтахтимизда муваффақиятли амалга оширилаётган «Келажак учун хорижий тил» лойиҳаси доирасидаги ишлар таҳлили турди. Учрашувда ўқувчилар учун яратилган имкониятлар, тизимга жалб этилган хорижлик ва маҳаллий мутахассислар фаолияти ҳамда лойиҳанинг самарадорлик мониторинги атрофлича муҳокама қилинди.

Вазир томонидан лойиҳанинг сифатли ижросини таъминлаш, хорижий тажрибани маҳаллий мактаблар муҳитига мослаштириш бўйича устувор вазифалар белгилаб берилди. Шунингдек, ўқув жараёнида замонавий методикаларни қўллаш ва педагоглар малакасини ошириш масалаларига алоҳида эътибор қаратилди.

Йиғилиш якунида соҳа масъуллари томонидан бугунги ҳолат ва истиқболдаги режалар акс этган тақдимотлар намойиш этилди. Вазир мутасаддиларнинг ҳисоботларини тинглаб, ҳар бир йўналиш бўйича аниқ кўрсатма ва топшириқлар берди.