Сенатда Тошкент шаҳар ҳокимлиги ҳузуридаги фуқароларнинг ўзини ўзи бошқариш органлари ходимларининг малакасини ошириш бўйича ўқув курси тингловчилари учун навбатдаги ўқув семинари ташкил этилди.

Тингловчиларга Сенат фаолияти, унинг ташкилий тузилмаси, шунингдек, қонун ижодкорлиги жараёнидаги ўрни ва аҳамияти ҳақида атрофлича маълумот берилди. Бу орқали маҳалла тизими вакилларининг давлат бошқаруви институтлари фаолияти тўғрисидаги билим ва кўникмаларини мустаҳкамлашга алоҳида эътибор қаратилди.

Шундан сўнг Сенатнинг Ёшлар, хотин-қизлар, маданият ва спорт масалалари қўмитаси аъзоси Малика Кадирханова иштирокида очиқ мулоқот бўлиб ўтди. Унда маҳалла институтларини ривожлантириш, оилавий қадриятларни мустаҳкамлаш, ёшлар, хотин-қизлар ва кексаларни ижтимоий қўллаб-қувватлаш масалалари юзасидан тингловчиларнинг фикр-мулоҳазалари ва амалий таклифлари кенг муҳокама қилинди.

Эслатиб ўтиш жоизки, Сенат қўмиталари ҳамда фуқароларнинг ўзини ўзи бошқариш органлари ходимларининг малакасини ошириш бўйича ўқув курслари тингловчилари ўртасида изчил ҳамкорлик йўлга қўйилган. Ушбу ҳамкорлик доирасида ҳафтанинг муайян кунида сенаторлар иштирокида мунтазам равишда амалий семинарлар ташкил этиб келинмоқда.