Франция президенти Эммануэль Макрон Ҳўрмуз бўғозида юзага келган вазиятда иккала томон ҳам айбдор деб ҳисоблайди. Унинг сўзларидан «Интерфакс» иқтибос келтирмоқда.

«Америка томонининг Ҳўрмуз бўғозида мақсадли блокадани сақлаб қолиш тўғрисидаги қароридан сўнг, Эрон расмийлари ўзларининг дастлабки позицияларини ўзгартирган бўлиши мумкин. Бу иккала томон учун ҳам хатодир», — деди Франция етакчиси.

У «барча вазминлик қилиши кераклигини» таъкидлади ва вазиятни дипломатик йўл билан ҳал этишга яна бир бор чақирди.

Макрон, шунингдек, Франция кемаси Ҳўрмуз бўғозида эронликлар томонидан ҳужумга учрагани ҳақидаги хабарларни рад этди. Унинг тушунтиришича, АҚШ блокадани олиб ташламасликка қарор қилганидан сўнг, Эрон томони хавотирга тушиб, огоҳлантирувчи ўқ узган. Бу эса француз кемаси ҳам бўлган бир қатор кемалар экипажларини ортга қайтишга мажбур қилган.

«Ва улар ҳақ эдилар. Франция томони зарар кўрмади ва жабрланмади», — деб таъкидлади Франция етакчиси.

Ўтган дам олиш кунлари Эрон армияси Бош штаби Теҳрон расмийлари Ҳўрмуз бўғозида кемалар ҳаракати устидан қатъий назоратни тиклаганини эълон қилди. Бунга жавобан АҚШ президенти Дональд Трамп агар ўт очишни тўхтатиш тартиби амал қилиш муддати тугагунга қадар Вашингтон ва Теҳрон келишувга эришмаса, у Эрон билан сулҳни узайтирмаслигини айтди.

Шунингдек, Америка етакчиси томонлар келишувни расмийлаштириб бўлмагунча, АҚШ Эрон портларидаги блокадани олиб ташламаслигини қайд этди.