Тошкент давлат аграр университети ректори ташаббуси билан олима аёллар ва талаба хотин-қизлар саломатлигини янада мустаҳкамлаш мақсадида фитнес клуб ташкил этилди ва бу хушхабар барча факультетлар қатори ётоқхоналарга ҳам яшин тезлигида тарқалди. «Ўсимликлар ҳимояси, агрокимё ва тупроқшунослик» факультети профессор-ўқитувчиларию талаба қизлари биринчилардан бўлиб шу ерга кириб келишди.

— Спорт билан мунтазам шуғулланиш, фитнесга қатнаш — фаровон ҳаёт, ғайрату шижоат, беқиёс ютуқлар демакдир. Президентимиз томонидан спортни ривожлантиришга бениҳоя катта эътибор қаратилаётганига ҳамоҳанг равишда фитнес клубнинг илм даргоҳининг ўзида пайдо бўлгани барчамизни беҳад қувонтирди, — дейди университет ўқитувчиси, агрокимёвий муаммолар йўналишида тадқиқотлар олиб бораётган олима Интизорхон Боқиева. — Ўнлаб қизлар, устозлар дарслардан сўнг сафимизга қўшиладиган бўлишди ва бу ҳақда телеграм каналда ёзишди. Қувончлиси, саломатлигига бефарқ бўлмаган кишилар орасида профессор устозларимиз ҳам бор. Ҳеч шубҳа йўқки, бу қулайлик иш самарадорлигини янада оширади, кайфиятни кўтаради. Умуман олганда эса университет раҳбарияти нафақат илмий тадқиқотлару маънавий -маърифий ишлар қатори таълим- тарбияга, балки оммавий спортни ривожлантиришга ҳам катта эътибор қаратмоқда. Ана шу сабабли талабаларимиз орасидан жаҳон ва Осиё чемпионлари етишиб чиқмоқда. Уларнинг сафи келгусида янада ортади. Чунки бугуннинг ўзидаёқ «Шоира Бегойим» ва «Дилбарим — бахтим» спорт клубларининг иқтидорли спорт усталари ҳафтасига уч карра ёшлар билан шуғулланишини эълон қилишди.

Абдунаби АЛИҚУЛОВ, «Халқ сўзи».