Сенатнинг Суд-ҳуқуқ масалалари ва коррупцияга қарши курашиш қўмитаси ҳамда Тоғ-кон саноати ва геология вазирлиги ўртасида ҳамкорлик Меморандуми имзоланди.

Меморандум коррупцияга қарши курашиш ҳамда ўзаро манфаатли ва долзарб йўналишлар бўйича ҳамкорликда учрашувлар, муҳокамалар, семинар-тренинг, давра суҳбатлари ва бошқа тадбирларни ташкил этишни назарда тутади.

Ҳамкорлик доирасида фуқаролик жамияти институти билан коррупцияга қарши курашиш соҳасида ҳуқуқий, ижтимоий ва иқтисодий таҳлиллар ўтказиш, жамоатчилик билан биргаликда эса геология ва кончилик соҳасида коррупция омилларини аниқлаш бўйича илмий тадқиқотлар олиб бориш каби устувор йўналишлар белгиланди.

Мазкур ҳужжат икки томонлама ҳамкорликни янги босқичга олиб чиқишга қаратилган бўлиб, кончилик ва геология соҳасидаги коррупциявий ҳолатларни барвақт аниқлаш ва бартараф этишга, очиқлик ва шаффофликни таъминлашга ҳамда соҳада парламент назоратини илмий-услубий жиҳатдан кучайтиришга хизмат қилади.

Томонлар кончилик ва геология ҳамда коррупцияга қарши курашиш соҳасидаги норматив-ҳуқуқий базани такомиллаштиришда, қонунчилик ҳужжатларини лойиҳаларни ишлаб чиқишда ҳамкорлик қилишга келишиб олдилар.