Ҳиндистоннинг тиббиёт соҳасидаги энг муҳим лицензиялаш имтиҳонларидан бири ҳисобланган «Foreign Medical Graduate Examination»нинг 2025 йил натижалари эълон қилинди. Бу ҳақида Таълим хабарлари Telegram-канали хабар берди.

Унга кўра, Ўзбекистон тиббиёт соҳаси бўйича чет эллик талабаларни тайёрлайдиган давлатлар орасида Ўзбекистон 40,37 фоизлик муваффақият кўрсаткичи билан дунёда тўртинчи, МДҲ ва Жанубий-Шарқий Осиё давлатлари ўртасида биринчи ўринни эгаллаган

Шунингдек, Ҳиндистон фуқаролари тиббий диплом олган хорижий мамлакатлар орасида Ўзбекистон етакчиликни қўлга киритган.

«Foreign Medical Graduate Examination» (FMGE) ўзи нима?

FMGE — бу Ҳиндистон фуқаролари хорижий давлатларда тиббиёт бўйича олий маълумот олгач, ўз юртида шифокор сифатида ишлаш ҳуқуқини қўлга киритиш учун топширадиган давлат имтиҳони.

Масалан, Ҳиндистонлик талаба Ўзбекистон, Россия, Қозоғистон, Хитой ёки бошқа давлатда тиббиёт соҳасида таҳсил олса, дипломни олганидан кейин Ҳиндистонга қайтиб ишлаш учун мазкур имтиҳондан ўтиши шарт. Имтиҳондан ўта олмаган битирувчи шифокорлик фаолияти билан шуғуллана олмайди.

Шу сабабли FMGE натижалари муайян университет ёки мамлакатдаги тиббий таълим сифати ҳақида муҳим тасаввур беради. Қайси мамлакат битирувчилари имтиҳондан кўпроқ ўтаётган бўлса, ўша ердаги таълим сифати ҳам юқори деб баҳоланади.

FMGE–2025 натижаларида МДҲ ҳамда Жанубий-Шарқий Осиё давлатлари тиббиёт олийгоҳлари ўртасида Ўзбекистон энг юқори натижа – 40,37 фоизлик кўрсаткични қайд этди. Бу рақам ҳар икки нафар битирувчидан қарийб бири Ҳиндистоннинг мураккаб лицензиялаш имтиҳонидан муваффақиятли ўтганини англатади.

Ўзбекистон учун бу қандай имкониятлар яратади?

Хорижий талабаларни жалб қилаётган мамлакатлар нафақат таълим хизматлари экспортини ривожлантирмоқда, балки ўзларининг халқаро нуфузини ҳам оширмоқда.

FMGE натижалари Ўзбекистоннинг таълим брендини мустаҳкамлаш учун муҳим асос бўлиб хизмат қилади. Биринчидан, Ўзбекистондаги тиббиёт университетларига бўлган ишонч ортади. Иккинчидан, хорижий талабалар сони кўпайиши мумкин. Учинчидан, университетларнинг халқаро рейтинглардаги позицияларини яхшилаш учун қўшимча имкониятлар яратилади. Тўртинчидан, тиббиёт таълими соҳасида халқаро ҳамкорлик янада кенгаяди.