Пайшанба – «Ёшлар куни» доирасида Олий Мажлис Сенатида Фан ва технологиялар университетининг бир гуруҳ талаба ёшлари ҳамда профессор-ўқитувчилари иштирокида «Раҳбар ва ёшлар учрашуви» ташкил этилди.

Тадбир давомида ёшларга Олий Мажлис Сенати фаолияти, мамлакатимизда амалга оширилаётган ижтимоий-иқтисодий ислоҳотлар, ички ва ташқи сиёсатнинг устувор йўналишлари, шунингдек, таълим, илм-фан ва соғлиқни сақлаш соҳаларида олиб борилаётган ислоҳотлар ҳақида батафсил маълумот берилди.

Учрашувда парламент фаолиятининг очиқлигини таъминлаш, ёшларнинг ижтимоий-сиёсий фаоллигини ошириш, уларнинг ташаббусларини қўллаб-қувватлаш ҳамда давлат бошқарувидаги иштирокини кенгайтириш масалалари юзасидан фикр алмашилди.

Шунингдек, сенаторлар талабаларга қонун ижодкорлиги жараёни, қонун лойиҳаларини ишлаб чиқиш ва муҳокама қилиш тартиби, парламент назоратининг асосий йўналишлари ҳамда сенаторлар фаолиятининг ўзига хос жиҳатлари ҳақида сўзлаб бердилар.

Очиқ ва самимий мулоқот тарзида ўтган тадбирда талабалар ўзларини қизиқтирган саволлар билан мурожаат қилиб, долзарб масалалар юзасидан батафсил жавоблар олдилар. Ёшлар томонидан билдирилган таклиф ва ташаббуслар ҳам тингланиб, уларни амалиётга татбиқ этиш юзасидан фикрлар билдирилди.

Тадбир якунида иштирокчилар Сенат фаолияти билан яқиндан танишиш имконияти яратилгани учун миннатдорлик билдириб, бундай учрашувлар ёшларнинг ҳуқуқий ва сиёсий билимларини ошириш, фаол фуқаролик позициясини шакллантириш ҳамда давлат бошқаруви тизимига бўлган қизиқишини кучайтиришда муҳим аҳамият касб этишини таъкидладилар.