Халқимизда «Уйи борнинг ўйи йўқ» деб бекорга айтишмаган. Уй-жой инсон ҳаётида, унинг келажаги қандай бўлишида муҳим аҳамият касб этади.

Шу маънода айтганда, Президентимизнинг 2021 йил 9 августдаги тегишли қарорига асосан, ота-онасиз, етимликда катта бўлган уй-жойга муҳтож ёшларнинг вояга етиши билан ўз уй-жойига эга бўлаётгани уларнинг катта ҳаётга ишонч билан қадам қўйиши, жамиятда ўз ўрнини топишига замин ҳозирлаяпти, янги режалар, мақсадлар сари руҳлантирмоқда.

Хусусан, ушбу қарор асосида Қашқадарё вилоятида ҳам шу кунга қадар икки юз нафарга яқин етим ва ота-она қарамоғидан маҳрум бўлган уйга муҳтож ёшларнинг рўйхати шакллантирилиб, белгиланган тартибда уй билан таъминланган эди. Бу гал эса уларнинг сони яна 20 нафарга ортди.

Вилоят ҳокимлигида ўтказилган тадбирда ушбу ёшларга янги уй-жойларнинг калити тантанали тарзда топширилди.

Тадбирда сўз олганлар томонидан таъкидланганидек, бу ёшлар ота-онасиз, қариндошлари қўлида катта бўлишган. Давлатимизнинг ижтимоий ҳимояга муҳтож ёшларга қаратаётган юксак эътибори, ғамхўрлиги натижасида бугун улар ҳеч бир тенгдошидан кам эмас.

Жаҳонгир БОЙМУРОДОВ, «Халқ сўзи».