Қоракўл туманида галофит ўсимликлардан иборат ўзига хос боғ барпо этилмоқда. 35 турдан зиёд бу ўсимликлар шўр ва қурғоқчил шароитга мослашган. 10 гектар майдонда ўтқазилган кўчатлар мутахассислар назорати остида парвариш қилиняпти.

— Бундай ўсимликлар қурғоқчиликка чидамли бўлиб, шўрхок ерларда ҳам ўсади, — дейди Ўзбекистон Экологик партияси вилоят кенгаши раиси ўринбосари, Халқ депутатлари вилоят Кенгаши депутати Жаҳонгир Шарипов. — Улар тупроқнинг шўрланишига ўзига хос тўсиқ вазифасини ўтайди. Бугина эмас, ҳолатининг яхшиланиши эвазига кейинчалик бу ерларда пахта, буғдой ва бошқа қишлоқ хўжалиги экинлари ҳам экиш мумкин.

Чўл шароитида барқарор экоиқлимни юзага келтиришга қаратилган бу юмуш вилоят Экология ва иқлим ўзгариши бош бошқармаси, ўрмон хўжалиги мутахассислари томонидан Хитойдан таклиф этилган мутахассислар иштирокида таҳлил қилиб борилмоқда. Чунки ҳар қандай ишда бўлгани каби галофит боғи барпо этишда ҳам илмий ёндашув талаб этилади. Қолаверса, ўсимликларнинг маҳаллий иқлимга мослашиши, ривожи келгусида бундай боғларни бошқа туманларда ҳам барпо этиш имкониятларини кўриб чиқишга шароит яратади.

Маълумот тариқасида айтиш керакки, чўлланишга қарши кураш воситасига айланган бу лойиҳа Хитой тажрибаси асосида Қоракўлдан ташқари республикамизнинг Арнасой, Муборак, Кармана туманлари, шунингдек, Нукусда ҳам амалга оширилмоқда.

Истам ИБРОҲИМОВ, «Халқ сўзи».