Бугун, 1 май санасидан бошлаб Тошкент метрополитенининг ерусти ҳалқа йўли йўналишида поездлар ҳаракати ҳар куни соат 05:00 дан 23:00 га қадар йўлга қўйилади. Бу ҳақда «Тошкент метрополитени» хабар берди.

Қайд этилишича, ушбу йўналишда метро поездлари шу вақтга қадар эрталаб соат 06:00 дан 23:00 га қадар йўловчиларга хизмат кўрсатиб келган. Эндиликда йўловчиларга кўрсатилаётган хизмат сифатини ошириш ва қўшимча қулайлик яратиш мақсадида қатнов вақти бир соатга узайтирилди.

Маълумот учун, Тошкент метрополитенининг бошқа йўналишларида — Чилонзор, Ўзбекистон ва Юнусобод линияларида поездлар ҳаракати ҳар куни эрталаб соат 05:00 дан тунги 00:00 га қадар амалга оширилмоқда.