Кеча «ИННОПРОМ. Марказий Осиё–2026» форуми доирасида видеоконференцалоқа орқали Кармана туманидаги саноат майдонида «Unigroup Navoiy» корхонасининг дастлабки лойиҳаларини ишга тушириш маросими бўлиб ўтган эди.

Бугун эса Татаристон Республикаси раиси Рустам Минниханов бошчилигидаги делегация Навоий вилоятига ташриф буюриб, корхонада ишлаб чиқариш жараёнлари билан танишди.

Мазкур лойиҳа Навоий саноатни ривожлантириш комплекси ҳудудида ўн ой ичида қурилиб ишга туширилди. Корхона косметика ва маиший кимё маҳсулотлари ишлаб чиқаришга ихтисослашган. Лойиҳа қиймати 65 млн АҚШ долларини ташкил этиб, йилига 85 миллион дона маҳсулот ишлаб чиқариш қувватига эга. Маҳсулотларининг 75 фоизи экспортга йўналтирилиши режалаштирилаётган корхонада 115 та янги иш ўрни яратилади.

Лойиҳа Ўзбекистон ва Россия иқтисодий алоқалари ҳамда самарали саноат кооперациясининг ифодаси бўлиб, замонавий технологиялар ва халқаро стандартлар асосида ташкил этилди. Унинг тўлиқ қувватларга чиқарилиши Навоий вилоятида қайта ишлаш саноатини кенгайтириш, хом-ашё ресурсларидан фойдаланишда замонавий ишлаб чиқариш технологияларини жорий этиш, импорт ўрнини босувчи ва экспортбоп маҳсулотлар ҳажмини янада оширишга хизмат қилади.

Темур ЭШБОЕВ, «Халқ сўзи».