Сенатнинг Суд-ҳуқуқ масалалари ва коррупцияга қарши курашиш қўмитаси ҳамда халқ депутатлари Сергели туман Кенгашининг қўшма мажлисида Сергели туманида жиноятчилик ҳамда коррупцияга қарши курашиш, ҳуқуқбузарликларнинг олдини олиш ва уларнинг профилактикаси ҳолати муҳокама қилинди.

Мажлисда Олий Мажлис Сенати аъзолари, маҳаллий Кенгаш доимий комиссиялари ва депутатлари, ҳуқуқни муҳофаза қилувчи органлар, ҳудудий давлат органлари ва ташкилотлари раҳбарлари, маҳалла фуқаролар йиғинлари раислари, фуқаролик жамияти институтлари ҳамда оммавий ахборот воситалари вакиллари иштирок этди.

Қайд этилганидек, Давлатимиз раҳбарининг ПҚ–1-сонли қарорида ҳар бир маҳаллада криминоген вазиятга салбий таъсир этувчи омиллар билан ишлаш, олдини олиш мумкин бўлган ҳар бир жиноят бўйича маҳаллий ҳокимликларнинг масъулиятини ошириш, ижтимоий профилактика самарадорлигини ошириш, аёллар ва ёшлар томонидан содир этиладиган жиноятларнинг олдини олиш, ҳуқуқбузарликлар ҳамда ижтимоий профилактика самарадорлиги устидан электрон назорат тизимини жорий этиш вазифалари белгиланган.

Мазкур вазифалардан келиб чиқиб, қўшма мажлисда Сергели туманида жиноятчилик ҳамда коррупциянинг олдини олиш, бозорларни рақамлаштириш, қурилиш соҳасида коррупцияга қарши курашиш, яширин иқтисодиётни қисқартириш, ҳуқуқий онг ва ҳуқуқий маданиятни ошириш ҳамда бошқа масалалар муҳокама қилинди.

Хусусан, Сергели тумани прокуратураси, Ички ишлар органлари фаолиятини мувофиқлаштириш бошқармаси ҳамда қатор ташкилотлар раҳбарларининг ахборотлари эшитилди.

Амалга оширилган ижобий ишлар билан биргаликда йўл қўйилган камчиликлар таъкидланиб, давлат органлари ва ташкилотларига келгусида амалга оширилиши лозим бўлган ишлар юзасидан тегишли вазифа ҳамда тавсиялар берилди.

Муҳокамалар якунида тегишли қарор қабул қилинди.