Эрон парламенти спикери Муҳаммад-Боқир Қолибоф АҚШ Президенти Дональд Трамп мамлакатлар ўртасидаги келишувлар ҳақида ёлғон маълумот тарқатаётганини маълум қилди. Унинг сўзларидан ТАСС иқтибос келтирмоқда.

«Бир соат ичида Қўшма Штатлар Президенти еттита баёнот берди ва уларнинг барчаси ёлғон. Улар бу ёлғон билан урушда ғалаба қозона олмадилар ва музокараларда ҳам албатта муваффақиятга эриша олмайдилар. Блокада давом этса, Ҳўрмуз бўғози орқали ўтиш эркин бўлиб қолмайди», — деди у.

Қолибофнинг қўшимча қилишича, Ҳўрмуз бўғози орқали денгиз транспортининг ҳаракати Теҳрон билан келишилган ҳолда ва у белгилаган йўналиш бўйича амалга оширилади.

Ислом Республикаси парламенти спикери Америка етакчисининг айнан қайси фикрларини назарда тутганига аниқлик киритмади.

Эслатиб ўтамиз, кеча Дональд Трамп бир нечта баёнотлар берган эди. У АҚШ ва Эрон вакиллари Ислом Республикасидан бойитилган уранни олиб чиқиб кетиш билан биргаликда шуғулланишини маълум қилиб, Теҳрон гўёки Вашингтондан ҳеч қандай музлатилган активларни олмасдан, ядровий дастурини муддатсиз тўхтатиб туришга тайёрлигини айтган эди. Америка етакчиси Эрон билан тузилиши мумкин бўлган келишув шартларининг катта қисми аллақачон келишиб бўлинганини таъкидлаган.

Бунга жавобан Эрон ТИВ вакили Исмоил Бақоий Ислом Республикаси бойитилган ураннинг мамлакатдан олиб чиқиб кетилишига йўл қўймаслигини билдирди.