Сурхондарёда ғалла ўрим-йиғими мавсуми уюшқоқлик ва эзгу анъаналар билан бошланди. Ҳар йилгидек, мавсум олдидан Ҳаким Термизий мажмуасида воҳа фаоллари, фермер ва деҳқонлар, меҳнат фахрийлари, соҳа мутасаддилари ҳамда кенг жамоатчилик иштирокида эҳсон тадбири ўтказилиб, юртга барака ва ризқ-рўз сўраб дуолар қилинди.

Тадбирда вилоят ҳокими Улуғбек Қосимов мамлакатимизда ғаллакорларни қўллаб-қувватлаш борасида амалга оширилаётган ислоҳотлар ҳақида сўз юритиб, мавсумни уюшқоқлик билан ўтказиш, дастурхонларимиз файзи бўлган донни нобуд қилмасдан йиғиштириб олишда кластер ва фермерлар барча куч ва имкониятларни сафарбар этиши муҳимлигини таъкидлади. Шунингдек, бу жараёнда тажрибали мутахассислар ва меҳнат фахрийларининг маслаҳат ва тажрибаси муҳим ўрин тутиши қайд этилди. Тадбирда юртимиз тинчлиги, халқимиз фаровонлиги ва ҳосилнинг баракали бўлиши тилаб дуолар қилинди.

Бу йилги ҳосил учун вилоятда 84 минг 672 гектар майдонда ғалла парваришланди. Ҳосилни қисқа муддатда нес-нобуд қилмасдан йиғиб олиш мақсадида 120 та махсус отряд шакллантирилиб, уларга 234 та юқори унумли комбайн ҳамда мингдан зиёд юк ташиш техникаси жалб этилди.

Жумладан, Музработ туманида 10 минг 500 гектар майдонда етиштирилган бошоқли дон эрта пишиб етилди. Ғаллакорларнинг агротехник тадбирларни ўз вақтида ва сифатли амалга оширгани, об-ҳавонинг қулай келиши мўл ҳосил етиштиришда муҳим омил бўлди. Айни пайтда ўрим-йиғим ишлари уюшқоқлик билан бошланди.

— Хўжалигимизда 30,8 гектар майдонда ғалланинг эрта пишар ва серҳосил «Турон» навини экиб, парваришладик, — дейди тумандаги «Дилшод Иброҳим» фермер хўжалиги раҳбари Носир Баратов. — Айни пайтда ҳар гектар майдондан ўртача 80-90 центнердан сара дон йиғиб оляпмиз.

Термиз, Ангор, Жарқўрғон каби туманларда ҳам пишиб етилган бошоқли донни ўриб-йиғиб олиш ишлари жадал суръатларда давом этмоқда. Йиғиб олинаётган ҳосил пешма-пеш қабул масканларига етказиб берилмоқда.

Фарҳод ЭСОНОВ, «Халқ сўзи».