Апрель ойининг ўртасида Термиз туманида ўриклар пишиб етилди. Ҳажман салкам олмага тенг бу мевалар кўзни қувнатади. Буни ҳудуддаги қуёш нури ва унумдор тупроқ уйғунлиги десак, яна бир муҳим жиҳат борки, бу ҳам бўлса, боғбоннинг сабр-тоқати, матонати ва меҳнати самараси эканидадир.

Боғбон Икром Усмонов тўққиз йил аввал «Асака ялтироқ» навли ўрик кўчатларини экиб, уларни парвариш қилди. Бироқ бу нав кутилган натижани бермади. Ўтган йили эса у дарахтларни «Микадо» навига пайванд қилди ва қисқа вақт ичида ижобий натижага эришди.

— Салкам ўн йилдан бери боғдорчилик билан шуғулланаман, — дейди боғбон Икром Усмонов. — Президентимиз томонидан яратилаётган имкониятлар, жумладан, субсидиялар ажратилиши ва ер майдонларининг берилгани соҳа ривожига туртки бўлмоқда. Бугунги кунда боғимда 300 тупдан зиёд юқори ҳосилдор ўрик дарахтлари бор. Ўтган йили пайванд қилингани сабабли жорий йилда илк ҳосилдан бир тоннадан ортиқ маҳсулот олишни режалаштиряпман. Кейинги йилларда ҳосил 4–5 тоннага етиши кутилмоқда. Тўлиқ ҳосилга кирганда ҳар бир дарахтдан 50 килограммдан зиёд мева олиш мумкин.

Айни пайтда экспорт қилувчи корхона вакиллари ўрик ҳосилини 180–200 минг сўмдан харид қилиб олишмоқда. Бу эса мавсумнинг фаол даври бошланганини кўрсатади.

Бу ҳали ҳаммаси эмас, боғ атрофидаги бир гектар бўш майдонларда экилган эртапишар қовунлар ҳам қуёшли кунлар шу тарзда давом этса, яқин бир ҳафта ичида пишиб етилиб, бозорларимизни яна бир маҳсулот билан бойитади.

Термиз тумани Сурхондарё вилоятининг энг иссиқ ҳудудларидан бири ҳисобланади. Шу боис бу ерда мева-сабзавот маҳсулотлари анча эрта пишади. Ўтган йили туман миришкорлари томонидан 15 га яқин давлатга 110 миллион долларлик маҳсулот экспорт қилинди. Жорий йилда ҳам экспорт ҳажмини ошириш имкониятлари мавжуд.

— Ҳудудимизда бундай муддатда ўрик пишгани аввал кузатилмаган, — дейди Агросаноатни ривожлантириш агентлиги Термиз тумани лойиҳа офиси раҳбари Қаҳрамон Тўраев. — Туманда минг гектардан ортиқ боғлар мавжуд бўлиб, шундан 490 гектари интенсив боғлар ҳисобланади. Уларда ресурс тежамкор технологиялар жорий этилган. Бугунги натижаларни ана шу ёндашувларнинг самараси дейиш мумкин.

Хулоса қилиб айтганда, ҳаракат қилган одам ўз рўзғорини ҳам обод қилади, бозорларимизни ҳам сифатли маҳсулот билан таъминлайди.

Фарҳод ЭСОНОВ, «Халқ сўзи».