“Халқ сўзи” нашрида “Мундиал сари” рукни давом этади. Бугунги сонимизда “B” гуруҳи вакили Босния ва Герцеговина терма жамоаси ҳақидаги маълумотлар билан танишамиз.

Умумий маълумотлар

Босния футбол ассоциацияси 1992 йилда ташкил этилган. Ушбу мамлакат 1996 йилдан бери FIFAʼнинг аъзоси ҳисобланади. Шунингдек, мамлакат 1996 йилда Европа Футбол Ассоциацияси, яъни UEFAʼнинг ҳам расмий аъзосига айланган.

Босния миллий терма жамоаси тарихдаги дастлабки ўйинини 1995 йилнинг 30 ноябрь санасида Албания терма жамоасига қарши ўтказган ва мазкур баҳсда 2:0 ҳисобида мағлубиятга учраган. Босния термаси тарихдаги энг йирик ғалабасини Лихтенштейн термаси устидан қўлга киритган. Вадуз шаҳрида бўлиб ўтган мазкур баҳсда боснияликлар 8:1 ҳисобида ғалаба қозонган.

Босния миллий терма жамоаси футбол бўйича Жаҳон чемпионатларида жами 1 марта иштирок этган. Жамоанинг мундиалдаги дастлабки ва ҳозирча охирги иштироки 2014 йилда кузатилган бўлиб, ўшанда жамоа мусобақадаги иштирокини гуруҳ босқичида якунлаган. Ўшанда жамоа Эрон, Аргентина ва Нигерия билан бир гуруҳдан ўрин олган эди.

Босния миллий терма жамоаси футбол бўйича Европа чемпионати (“Евро”) мусобақасининг финал босқичида бирор марта иштирок этмаган.

Жамоа 2016 йил Японияда бўлиб ўтган “Kirin Cup” мусобақасида ғолиб бўлишни уддалаган.

Жаҳон чемпионати сари босиб ўтган йўли

Европада Жаҳон чемпионати саралаши 2 та асосий босқичдан иборат бўлди. Босния терма жамоаси саралашдаги иштирокини “H” гуруҳида бошлади. Гуруҳда боснияликлардан ташқари Австрия, Сан-Марино, Руминия ва Кипр терма жамоалари бор эди.

Босния терма жамоаси мусобақа саралашини жуда яхши бошлади. Жамоа дастлаб сафарда Руминия термасини 1:0 ҳисобида мағлубиятга учратди. Иккинчи турда Кипр устидан 2:1 ҳисобида устун келди. Учинчи турда Босния Сан-Маринони мағлуб этди.

Тўртинчи ўйинда Босния сафарда Сан-Марино меҳмони бўлди ва ушбу жамоа дарвозасига 6 та тўп киритишни уддалади. Лекин кейинги икки ўйин омадсиз ўтди. Жамоа дастлаб Австрияга 2:1 ҳисобида мағлуб бўлди, кейинги турда эса Кипр билан дуранг ўйнади.

Саралашнинг сўнгги ойида Босния дастлаб Руминияни мағлуб этди. Сўнгги турда жамоани Австрияга қарши мундиал йўлланмаси тикилган баҳс кутарди. Лекин Босния бу ўйинни юта олмади. Аммо плей-офф орқали мундиалга чиқиш имкониятини сақлаб қолди.

UEFA плей-оффининг дастлабки баҳсида Босния термаси Кардифф шаҳрида Уэльс билан куч синашди. Учрашувнинг асосий вақти 1:1 ҳисобидаги дуранг натижа билан якунланди. Пенальтилар сериясида омад Боснияга кулиб боқди.

Ҳал қилувчи баҳсда ушбу юрт вакилларига Италия термаси рақиблик қилди. Кўп мутахассислар ўйин олдидан Италиянинг имкониятларини юқори баҳолашди. Аммо, баҳснинг асосий вақти яна 1:1 ҳисобида якунланди ва футбол лотереясида омад яна Боснияга кулиб боқди. Шу тариқа жамоа ўз тарихида иккинчи марта мундиалда ўйнаш ҳуқуқига эга бўлди.

Сўнгги ўйинлар

Босния терма жамоаси сўнгги 12 ой ичида жами 10 та ўйин ўтказди. Ушбу ўйинлардан 6 таси жамоанинг ғалабаси билан якунланди. 2 та ўйинда дуранг натижа қайд этилди ва яна 2 та ўйин боснияликларнинг мағлубияти билан якунланди.

Жамоа охирги ўйинларида Австрия ва Словения каби терма жамоаларга мағлуб бўлиш билан бир қаторда Уэльс, Мальта, Румыния ва Италия каби термаларни мағлуб этишни ҳам уддалади.

Бош мураббийи

Айни вақтда Босния ва Герцеговина терма жамоасини маҳаллий мутахассис Сергей Барбарез бошқармоқда. 54 ёшли мутахассис терма жамоани 2024 йил апрель ойидан бери бошқариб келмоқда.

Қизиғи, Барбарез бунга қадар бош мураббий сифатида бирорта терма жамоада ҳам, клубда ҳам ишламаган. Босния миллий терма жамоаси унинг мураббийликдаги дастлабки жамоаси ҳисобланади.

Сергей Барбарез босниялик собиқ футболчи бўлиб, вақтида “Ганновер”, “Унион Берлин”, “Боруссия Дортмунд”, “Байер” каби жамоаларда тўп сурган. Босния миллий терма жамоаси сафида 47 та ўйинда майдонга тушиб, 17 та гол киритган.

Футболчилар

Айни вақтда босниялик энг машҳур футболчилар ҳақида гап борса, қуйидаги футболчиларни эслаб ўтиш мумкин:

Эдин Жеко — (“Шальке 04”, Германия);

Эрмедин Демирович — (“Штутгарт”, Германия);

Амар Дедич — (“Бенфика”, Португалия);

Керим Алайбегович — (“Лейпциг”, Германия);

Сеад Колашинац — (“Аталанта”, Италия).

Жаҳон чемпионатидаги ўйинлари ва учрашувлар санаси

Босния миллий терма жамоаси Жаҳон чемпионатида “B” гуруҳидан ўрин олди. Гуруҳда ушбу мамлакатдан ташқари Канада, Қатар ва Швейцария терма жамоалари ҳам мавжуд.

Ушбу терма жамоаларга қарши баҳслар қуйидаги саналарда бўлиб ўтади:

Босния — Канада (14 июнь);

Швейцария — Босния (19 июнь);

Босния — Қатар (25 июнь).

Жамоанинг мундиалдаги имкониятлари

Босния терма жамоасининг мундиалдаги имкониятлари юқори баҳоланаётгани йўқ. Жамоа учун асосий миссия гуруҳдан чиқиш бўлса ажаб эмас.

Гуруҳда Босния фақатгина Қатардан кўра кучлироқдек кўринмоқда. Аммо, мезбон Канада ва минтақадоши Швейцарияга қарши баҳслар осон бўлмаслиги аниқ.

Шу билан бирга, жамоанинг Жаҳон чемпионати саралашида пенальтилар сериясида тажриба орттиргани кейинги босқичларда асқотиши мумкин.