Оқдарё тумани Тараққиёт маҳалласида яқинда «EVRO STANDART PROFILE SYSTEM» масъулияти чекланган жамиятига қарашли янги корхона иш бошлади.

Турли хилдаги қурилиш маҳсулотлари ишлаб чиқариш асосий мақсади бўлган корхонада ҳозир 120 та иш ўринлари яратилган бўлиб, иш уч сменада ташкил этилган. Яқиндагина ишга тушган корхонада аллақачон маҳсулот экспорти ҳам йўлга қўйилган. Ҳозир Қирғизистонга маҳсулот чиқарилаётган бўлса, Тожикистон билан ҳам шартнома тузиш ишлари бошлаб юборилмоқда. Келгусида маҳсулотнинг 50 фоизини экспортга йўналтириш кўзда тутилган.

— Корхонамизга 5 млн АҚШ долларлик инвестиция киритилган бўлиб, ускуналар Туркия ва Хитойдан келтирилган, — дейди МЧЖ раҳбари Тоҳир Тулабоев. — Ишчи-ходимларнинг самарали ишлаши учун керакли барча шароитларни яратганмиз. Жумладан, ишчилар учун барча қулайликларга эга шинам ошхона ҳамда ётоқхоналар барпо этилган.

Маҳсулот тўла шу ернинг ўзида охирига етказилиб, ишлаб чиқарилаётганлиги учун таннархи рақобатчи корхоналар маҳсулотига нисбатан арзон. Бу сифатга салбий таъсир қилмайди. Аксинча, ҳозир бозор шароитида энг муҳим омил сифат эканлигини тадбиркорлар яхши англашади.

Келгусида корхонани кенгайтириб, алюмин профиллар ишлаб чиқаришни йўлга қўйиш ва шу орқали яна 100 та янги иш ўрини яратиш кўзда тутилган.

Абдулазиз ЙЎЛДОШЕВ, «Халқ сўзи».