Тошкент шаҳрида қизларни жинсий эксплуатация қилиш учун хорижга юбориш билан шуғулланувчи жиноий гуруҳ аъзоси ушланди. Бу ҳақида «Хавфсизлик» Telegram-канали хабар берди.

Маълум қилинишича, одам савдосига қарши курашиш йўналишида ДХХ Тошкент шаҳар бўйича бошқармаси ходимлари томонидан Ички ишлар органлари билан ҳамкорликда тезкор тадбир ўтказилган.

Тезкор тадбир давомида пойтахт ҳудудида қизларни хорижий давлатларга жинсий эксплуатация қилиш учун юбориш билан шуғулланувчи жиноий гуруҳ вакили ҳисобланган, 2002 йилда Тошкент вилоятининг Бўстонлиқ туманида туғилган аёл қўлга олинган.

У 4 нафар қизларни алдов йўли билан ёллаб, улардан бирини ўзи билан бирга Дубай шаҳрига олиб кетаётган вақтида Тошкент халқаро аэропортида тўхтатиб қолинган.

Ҳолат юзасидан ушбу шахсга нисбатан Жиноят Кодексининг 135-моддаси (одам савдоси) 2-қисми «з» банди билан жиноят иши қўзғатилиб, «қамоқ» эҳтиёт чораси қўлланилди. Ҳозирда тергов ҳаракатлари олиб борилмоқда.

Маълумот учун, амалдаги қонунчиликка мувофиқ, бу турдаги жиноятлар учун 5 йилдан 10 йил муддатгача озодликдан маҳрум қилиш жазоси белгиланган.