Президентнинг «Маданият, санъат ва адабиёт соҳаларини янада ривожлантириш бўйича кенг кўламли чора-тадбирлар тўғрисида»ги Фармони қабул қилинди.

Фармонга кўра, 2026 йил 1 июлдан ҳар йили 1000 нафар уй-жойга муҳтож маданият, санъат ва ижодий соҳа вакилларига бирламчи бозордан квартира сотиб олиш учун қуйидаги тартибда ипотека кредитларини ажратиш йўлга қўйилади, бунда:

• ипотека кредитлари ажратишда бошланғич тўлов кредит олувчи томонидан Фармонда белгиланган миқдорларда шакллантирилади, бунда бошланғич тўловнинг 50 фоизи ҳамда кредит муддатининг биринчи 5 йили давомида тўланадиган фоизларнинг 10 фоиздан ошган қисми Давлат бюджетидан қоплаб берилади;

• бошланғич тўловнинг 50 фоизини қоплаб бериш «subsidiya.idm.uz» дастурий таъминот тизими орқали автоматлаштирилган ҳолда амалга оширилади.

Бир ҳудуддан бошқа ҳудудга келиб ишлаётган ва ушбу ҳудудда ўз уй-жойига эга бўлмаган маданият, санъат ва адабиёт соҳалари вакилларига уй-жой ижараси тўловларининг бир қисмини қуйидаги миқдорларда қоплаб бериш тартиби жорий этилади:

• Тошкент шаҳрида – БҲМнинг 6 баравари;

• Қорақалпоғистон Республикаси ва вилоятларда – БҲМнинг 4 баравари.