Тошкент шаҳрида кўнгилочар фестиваль ўтказилиши муносабати билан иккита кўчанинг айрим қисмлари транспорт воситалари ҳаракати учун вақтинча ёпилди. Бу ҳақда пойтахт ҳокимлиги хабар берди.

Маълум қилинишича, бугун, 4 июнь соат 06:00 дан 8 июнь соат 07:00 гача:

Тарас Шевченко кўчасининг Фидокор кўчаси кесишмасидан Нукус кўчаси кесишмасигача;
Саййид Барака кўчасининг Ойбек кўчаси кесишмасидан Амир Темур шоҳ кўчасигача бўлган қисми барча транспорт воситалари ҳаракати учун ёпилади.

Ҳокимлик ҳайдовчилардан юқорида кўрсатилган давр мобайнида муқобил йўналишлардан фойдаланишини тавсия қилиб, ноқулайликлар учун узр сўраган.

«Beer Fest 2026» фестивалининг Instagramʼдаги саҳифасида ҳам айнан Тарас Шевченко кўчасида 5-, 6- ва 7 июнь кунлари байрам тадбирлари ўтказилиши эълон қилинган. Маълумки, «Beer Fest» — бу пиво фестивали.