Сўнгги пайтларда Telegram мессенжери орқали фойдаланувчиларга Ўзбекистон Республикаси Ташқи ишлар вазирлиги раҳбарияти номига очилган сохта аккаунтлардан вирусли хабарлар юборилмоқда.

Маълум қилишича, ушбу вирусли хабарлар «Яқин вақт ичида сиз билан Коррупцияга қарши курашиш агентлиги терговчиси боғланиб, бир қатор саволлар беради ва муаммо моҳиятини батафсил тушунтиради. Илтимос, ушбу маълумот қатъий махфий ҳисобланишини инобатга олинг. Текширув жараёни ва мазкур хабар мазмунини ҳеч кимга ошкор этманг» мазмунида юборилмоқда.

Ташқи ишлар вазири матбуот котибининг билдиришича, бу каби хабарномалар ёлғон ҳисобланиб, молиявий зарар етказиш мақсадида кибержиноятчилар томонидан амалга оширилаётган тузоқдир.

Шунингдек, ТИВ юртдошларимизни бу каби фирибгарликнинг янги турларига алданмаслик ва доимо огоҳ бўлишга чақиргани.