Фарғона вилояти делегацияси Японияга ташрифи доирасида замонавий ва келажак касбларини ўқитиш марказлари ҳамда бу борада янги авлод мутахассисларини тайёрлаш борасида яратилган шароитлар билан яқиндан танишди.

Хусусан, бугунги кунда мамлакат пойтахти – Токио шаҳрида жойлашган дастурий маҳсулотлар, робототехника ҳамда сунъий интеллект йўналишида ихтисослашган корхоналарда ёшлар самарали фаолият кўрсатмоқда. Бу ерда илмий-амалий тажрибаларни ўзаро уйғунлаштириш, бизнес-лойиҳаларни амалга татбиқ этиш учун барча имкониятлар мавжуд. Замонавий корхоналарда таълим ва ишлаб чиқариш интеграцияси йўлга қўйилган.

— Қувонарлиси, ушбу корхоналарга малакали мутахассислар сифатида юртимиз ёшлари ҳам жалб этилган, — дейди Фарғона вилояти ҳокимининг сунъий интеллект ва рақамли технологияларни ривожлантириш масалалари бўйича маслаҳатчиси Баҳромжон Жалилов. — Мисол учун, Токио шаҳрида фарғоналик ёшлар томонидан «Eco Turon Logistika» корхонаси фаолияти йўлга қўйилган.

Айни пайтда корхонада халқаро миқёсда транспорт-логистика хизматлари кўрсатиш фаолиятини мувофиқлаштириш, экспортёр корхоналар учун жаҳон бозорида бренд савдо тармоқлари билан фаол ҳамкорликни йўлга қўйишга кўмаклашиш бўйича амалий саъй-ҳаракатлар олиб борилмоқда.

Юзма-юз мулоқотда ушбу лойиҳа асосида Фарғона вилоятида ҳам замонавий транспорт-логистика марказини ташкил этишга келишиб олинди. Ўзаро келишувга кўра, бу ерда хизмат кўрсатиш фаолияти билан бирга, йигит-қизларни замонавий ва келажак касбларига ўқитиш ҳам йўлга қўйилади.

Таъкидлаш жоизки, эътибор ва рағбат туфайли Кунчиқар юртда бу каби янги авлод корхоналари тизими шаклланган. Фарғона вилояти делегацияси томонидан ўрганилган «Kanaria Tech» корхонасида сунъий интеллект имкониятларидан унумли фойдаланилмоқда. Шу тариқа корхона жамоаси логистика хизматлари кўрсатишга мўлжалланган роботларни ижтимоий муҳитга мослаштириш борасида қувонарли ютуқларга эришяпти.

Ўз навбатида «Stone System IT» корхонасида бўлиб ўтган учрашувда ўзаро ҳамкорликда истиқболли лойиҳаларни тайёрлаш малакасини шакллантириш бўйича Фарғона ёшларидан иборат жамоа фаолиятини шакллантиришга келишиб олингани эътиборга молик.

Шунингдек, «CIC Venture Cafe»да стартаплар, венчур фондлар ва инвесторлар, уларга сармоя киритиш йўналишлари хусусида япониялик ҳамда халқаро мутахассислар иштирокида маҳорат дарслари ўтказилди.

Ботир МАДИЁРОВ, «Халқ сўзи».