Мексиканинг Наярит штатида «Боғбон» (El Jardinero) лақаби билан танилган наркобарон Аудиас Флорес Сильва қўлга олинди. Бу ҳақда мамлакат жамоат хавфсизлиги ва фуқароларни ҳимоя қилиш вазири Омар Гарсиа Харфуш маълум қилди, унинг сўзларидан ТАСС иқтибос келтирмоқда.

«Ҳарбий-денгиз флоти вазирлигининг махсус тайёргарликдан ўтган кучлари томонидан режалаштирилган ва амалга оширилган операция давомида Наярит штатида «Боғбон» лақабли Аудиас Флорес Сильва қўлга олинди», — дея қайд этди Харфуш.

Қўлга олинган шахсга нисбатан Мексикада ҳибсга олиш ордери мавжуд бўлиб, бундан ташқари, у экстрадиция қилиш мақсадида АҚШ расмийлари томонидан ҳам қидирувга берилган эди.

Қўшма Штатлар Аудиас Флорес Сильвани қўлга олишга ёрдам берадиган маълумот учун 5 миллион доллар мукофот таклиф қилган.

«Боғбон» — «Халиско янги авлоди» (Jalisco New Generation Cartel) картелининг асосий раҳбарларидан бири бўлган. У гуруҳнинг собиқ етакчиси, 2026 йил февраль ойида қўлга олиш чоғида ўлдирилган Немесио Осегера Сервантес («Эль Менчо»)нинг эҳтимолий вориси деб аталаётган эди.

Аудиас Флорес Сильва картелнинг логистикаси, хавфсизлиги ва ҳудудий кенгайиши учун масъул бўлган.