Голливуднинг энг ёрқин жуфтликларидан бири — Том Холланд ва Зендая расман турмуш қуришди. Бу ҳақда АҚШ киноактёрлар гильдияси (SAG Awards) мукофотини топшириш маросими арафасида Зендаянинг шахсий стилисти Лоу Роуч маълум қилди.

Машҳур стилист журналистлар билан суҳбатда икки ёш барчадан сир тутган ҳолда яширин тўй маросими ўтказишганига шама қилди.

«Тўй аллақачон бўлиб ўтди. Сиз уни ўтказиб юбордингиз. Бу — мутлақо ҳақиқат», — дея таъкидлади Роуч журналистнинг саволига жавобан.

Эслатиб ўтамиз, юлдузли жуфтликнинг танишуви 2016 йилда «Ўргимчак одам: Уйга қайтиш» фильми суратга олиш жараёнларида бошланган эди. Узоқ вақт давомида дўстона муносабатда бўлган актёрлар фақат 2021 йилга келибгина ўз муҳаббатларини очиқчасига тасдиқлашган.

Уларнинг унаштирилгани ҳақидаги миш-мишлар 2025 йилги «Олтин глобус» маросимидан сўнг болалаган эди. Ўшанда Зендая бармоғидаги йирик бриллиант узук билан кўриниш берган, кўп ўтмай Том Холланд интервьюларининг бирида актрисани «бўлажак рафиқам» деб атаб, барча шубҳаларга чек қўйган эди.