Олий малака тоифасига (бош ўқитувчи лавозимига) эга педагогларга ипотека кредитлари бўйича субсидияга аризалар қабул қилиш бугун, 20 апрель куни соат 14:00 дан бошланади. Бу ҳақида Таълим назорати Telegram-канали хабар берди.

Маълумот учун, субсидия Вазирлар Маҳкамасининг 2026 йил 19 февралдаги 69-сон қарори билан тасдиқланган низомга мувофиқ ипотека кредити бўйича бошланғич бадалнинг 25 фоиз қисмини қоплаб бериш учун Давлат бюджети маблағлари ҳисобидан ажратилади.

Эслатиб ўтамиз, ариза берувчида, шу жумладан, унинг турмуш ўртоғининг номида республиканинг барча ҳудудлари миқёсида икки ва ундан ортиқ мулк ҳуқуқи билан турар жой мавжуд бўлмаслиги, шунингдек, камида 15 йил педагогик иш стажига ҳамда олий малака тоифасига ёки бош ўқитувчи лавозимига эга бўлиши лозим бўлади.

Субсидия олиш учун қуйидаги усуллар орқали ариза топширишингиз мумкин:

Давлат хизматлари марказларига бевосита мурожаат қилиш;
«MyGov» мобил иловаси;
«My.gov.uz» портали орқали.