АҚШ ҳукумати мамлакат ҳудудида ҳибсда сақланаётган мигрант болаларни депортация қилишни тезлаштириш чораларини кўрмоқда. Бу ҳақда ТАСС CNN телеканалига таяниб хабар бермоқда.

Боланинг АҚШда қолиш ҳуқуқи бўйича қарор қабул қилинадиган суд мажлислари муддатлари бир неча ҳафта ёки ой олдинга сурилмоқда. Бу болалар ҳуқуқларини ҳимоя қилувчи юристлар ишини сезиларли даражада қийинлаштирмоқда.

Вояга етмаган мигрантлар бир неча ҳафта давомида қайта-қайта судга келишга ва ишларининг бориши ҳақида маълумот беришга мажбур бўлишмоқда, баъзан эса бу жараёнлар юридик ёрдамсиз амалга оширилмоқда.

CNN қайд этишича, тез-тез ўтказиладиган суд мажлислари суд ва иммиграция тизими билан эндигина танишаётган болаларда хавотир ва қўрқув уйғотмоқда.

Жорий йилнинг март ойи ҳолатига кўра, АҚШ Соғлиқни сақлаш ва ижтимоий хизматлар вазирлиги васийлигида 2 мингдан ортиқ мигрант болалар бўлган.

Мазкур идора АҚШнинг 24 та штатида кузатувчисиз қолган бола-мигрантларга ғамхўрлик қилувчи муассаса ва дастурлар фаолиятини молиялаштиради.