Қашқадарё вилоятида “Давлат тиббий суғуртаси тизимида бепул тиббий хизмат олиш тартиби” мавзусида пресс-тур бўлиб ўтди.

Унда оммавий ахборот воситалари ходимлари Қарши шаҳар тиббиёт бирлашмасида, сўнгра Вилоят болалар кўп тармоқли тиббиёт марказидан бўлиб, давлат тиббий суғуртаси тизими доирасида аҳолига кўрсатилаётган бепул тиббий хизматлар, бу борада яратилган шарт-шароитлар билан яқиндан танишишди.

Ўзбекистон Республикаси Президентининг 2024 йил 5 сентябрдаги “Давлат тиббий суғуртаси механизмларини жорий этишга оид чора-тадбирлар тўғрисида”ги қарорига мувофиқ, мамлакатимизда тиббий хизматлар сифатини ошириш ва суғурта механизмларини кенг жорий этиш бўйича изчил ишлар амалга оширилмоқда. Мазкур қарорга асосан, 2025 йил 1 октябрдан бошлаб Қашқадарё вилоятида ҳам давлат тиббий суғуртаси тизими жорий этилди.

Ҳозирги кунда Давлат тиббий суғуртаси жамғармаси томонидан вилоятдаги 299 та тиббиёт муассасаси билан шартномалар тузилган. Бу эса аҳолига тиббий хизматлардан кенг фойдаланиш имконини яратмоқда. Фуқаролар эндиликда ўз хоҳишига кўра тиббиёт муассасасини танлаш имкониятига эга бўлиб, кафолатланган тиббий хизматлар пакети доирасида бепул ва сифатли тиббий ёрдам олмоқда. Бу, айниқса, кам таъминланган ва ижтимоий ҳимояга муҳтож аҳоли қатламлари учун муҳим аҳамият касб этмоқда.

Пресс-тур давомида иштирокчилар Қарши шаҳар тиббиёт бирлашмасида бўлиб, имтиёзли йўлланмаларни шакллантириш жараёни билан танишдилар. Унда беморга юқори технологияли жарроҳлик амалиёти зарурлиги аниқланиб, оилавий шифокор йўлланмаси асосида Вилоят болалар кўп тармоқли тиббиёт марказига йўналтирилди. Эътиборлиси, мазкур жарроҳлик амалиёти харажатлари Давлат тиббий суғуртаси жамғармаси томонидан қоплаб берилмоқда.

Вилоят болалар кўп тармоқли тиббиёт марказидан маълум қилишларича, бу ерда 153 нафар бемор имтиёзли йўлланма билан даволанган бўлиб, уларга кўрсатилган тиббий хизматлар учун 1 миллиард 392 миллион сўм маблағ жамғарма томонидан қоплаб берилган.

Тадбир давомида иштирокчиларга давлат тиббий суғуртасидан фойдаланиш тартиби ҳақида батафсил маълумот берилди.

Жаҳонгир БОЙМУРОДОВ, «Халқ сўзи».