Олий Мажлис Қонунчилик палатасининг Экология ва атроф-муҳитни муҳофаза қилиш масалалари қўмитаси ҳамда Ўзбекистон Экологик партияси фракцияси томонидан «Яшил макон» лойиҳасини амалга оширишда кўчатчиликни ривожлантириш ва питомниклар тармоғини кенгайтириш бўйича Фарғона вилояти тажрибасига бағишланган илмий-амалий семинар ўтказилди.

Таъкидланганидек, кейинги йилларда мамлакатимизда Президентимиз ташаббуси билан «Яшил макон» умуммиллий лойиҳаси амалга оширилмоқда. Юртимизда яшил ҳудудларни кенгайтириш, экология ва атроф-муҳит мусаффолигини таъминлашдек эзгу мақсадни кўзлаган ушбу лойиҳа умуммиллий ҳаракатга айланди.

Соҳада олиб борилаётган ишларнинг мантиқий давоми сифатида «Маҳаллани ривожлантириш ва жамиятни юксалтириш» йилида устувор йўналишлар бўйича ислоҳотлар дастурлари ва «Ўзбекистон — 2030» стратегиясини амалга ошириш бўйича давлат дастурида 2026 йилда 365 минг гектар ерда дарахт ва буталарни экиш, 14 та ҳудудда ботаника ва дендрология боғлари, 20 та соя салқин сайр кўчалари, Сурхондарёда 10 минг гектарда яшил макон ва Сирдарёда 84 километрли «яшил девор» барпо этиш ишлари устувор вазифа сифатида белгилаб берилган.

Семинарда ҳудудларнинг иқлим, тупроқ ва сув шароитига мос кўчат турларини етиштиришда кўчатчиликни ривожлантириш ва питомниклар муҳим аҳамиятга эгалиги алоҳида қайд этилди. Тадбир иштирокчилари учун кўчатларни экиш ва уларни парваришлашнинг илмий ҳамда амалий жиҳатлари юзасидан маълумотлар берилди.

Жумладан, Қува туманидаги Томорқа ер участкаларини ривожлантириш илмий-амалий маркази марказига қарашли 396 гектар қишлоқ хўжалиги ер майдонларида кооперация усулида, оилавий пудрат шартномалари асосида юз турдан ортиқ мевали ва манзарали кўчатлар ҳамда цитрус , доривор ўсимликлар етиштирилмоқда. Ҳозирги кунда Марказда ўн миллион дона кўчат мавжуд эканлиги, улар замонавий агротехнологиялар асосида парвариш қилинаётгани ва амалдаги стандарт ҳамда техник талабларга тўлиқ жавоб бериши кўрсатиб ўтилди.

Тадбирда қишлоқ хўжалиги соҳасида илмий-амалий ишлар, интенсив боғдорчилик, кўчатчилик, экспорт ва кадрлар тайёрлаш йўналишларида комплекс фаолият амалга оширилаётганлиги ҳамда белгиланган лойиҳаларни амалга ошириш учун зарур ташкилий, моддий-техник ва кадрлар салоҳияти мавжудлиги иштирокчилар томонидан эътироф этилди.

Семинар доирасида Қува туманида кўчат экиш акцияси ташкил этилди. Ушбу тадбирлар аҳоли ўртасида экологик маданиятни юксалтириш, мамлакатимиз яшиллик даражасини оширишга хизмат қилиши қайд этилди.