Сенатнинг Фан, таълим ва соғлиқни сақлаш масалалари қўмитаси аъзоси Гулнора Маруфова Фарғона вилоятининг Ёзёвон туманида «Янги Ўзбекистон қиёфасидаги маҳалла» тамойили асосида амалга оширилаётган ишлар билан танишди.

Жумладан, қатор зиёратгоҳларда таъмирлаш ва реконструкция ишлари амалга оширилмоқда. Хусусан, «Сой Ёни» маҳалла фуқаролар йиғини ҳудудида жойлашган «Ғойиб ота» зиёратгоҳида қурилиш-таъмирлаш ишлари сифати, қурилиш жараёнларининг бориши ва зиёратгоҳ инфратузилмасини янада такомиллаштириш масалалари юзасидан сенатор томонидан масъулларга тегишли тавсиялар берилди. Шунингдек, «Халфа бува» ва «Юқори» маҳаллаларидаги зиёратгоҳларда яратилаётган шарт-шароитларга, ташриф буюрувчилар учун қулайликлар яратиш ва объектларнинг архитектуравий қиёфасини сақлаш масалаларига алоҳида эътибор қаратилди.

Бундан ташқари, халқ депутатлари Ёзёвон туман Кенгашида депутатлар, давлат ташкилотлари ва муассасалар раҳбарлари иштирокида сенатор учрашув ўтказди. Учрашувда туманни ижтимоий-иқтисодий ривожлантириш, аҳолини қийнаб келаётган айрим муаммоларни ҳал этиш, ижтимоий соҳа объектлари фаолиятини янада такомиллаштириш, инфратузилмани ривожлантириш масалалари ҳамда фуқаролар мурожаатларида кўтарилаётган масалалар муҳокама қилинди.

Сенатор туманда мавжуд муаммолар ва уларни бартараф этиш бўйича таклифларни кўриб чиқиб, масъулларга тегишли тавсиялар берди.