АҚШ Президенти Дональд Трамп Эрон музокараларда иштирок этишда давом этади, деб ҳисоблайди. Унинг сўзларидан ТАСС иқтибос келтирмоқда.

«Улар музокараларда иштирок этишади. Агар бу содир бўлмаса, улар илгари дуч келмаган муаммоларга дуч келишади. Умид қиламанки, улар адолатли келишув тузиб, мамлакатни қайта тиклашади. Аммо бу амалга ошганда, уларда ядро қуроли бўлмайди, биз бунга йўл қўймаймиз», — деди Америка етакчиси радиобошловчи Жон Фредериксга берган интервьюсида.

Бундан олдин Эрон парламенти спикери Муҳаммад-Боқир Ғолибоф агар Вашингтон Ислом Республикасига таҳдид қилишда давом этса, Теҳрон музокаралар олиб бормаслигини билдирган эди.

11 апрель куни Эрон ва АҚШ Исломободда (Покистон) бир неча раунд музокаралар ўтказди. Бироқ зиддиятлар туфайли томонлар можарони узоқ муддатли ҳал этиш масаласида келишувга эриша олмадилар.

Ҳозирча маслаҳатлашувларнинг янги раунди бўлиб ўтиши ёки йўқлиги номаълум. Вашингтон ўз делегациясини Покистон пойтахтига яна юбориш ниятида эканини маълум қилган. Ушбу музокаралар 21 апрель куни бўлиб ўтиши тахмин қилинмоқда.