Тошкент вилоятининг хушҳаво Оҳангарон тумани Ўрғоз қишлоғида анъанавий VIII «Илоқ» этнографик фестивали юқори савияда ташкил этилди.

Халқаро «Олтин мерос» хайрия жамоат фонди, Тошкент вилояти ва Оҳангарон тумани ҳокимликлари, шунингдек, вилоят Туризм ва Маданият бошқармалари ҳамкорлигида ўтказилган ушбу йирик маданий тадбир миллий қадриятларимизни улуғлаш ва туризм салоҳиятини намойиш этишга хизмат қилди.

Тадбир эрта тонгдан карнай-сурнай садолари ва меҳмонларни кутиб олиш маросими билан бошланди. Фестивалнинг тантанали очилиш қисмида Оҳангарон тумани ҳокими Баҳромжон Норқобилов ҳамда Халқаро «Олтин мерос» хайрия жамоат фонди бошқаруви раиси Амирқул Каримов сўзга чиқиб, йиғилганларни қутладилар ва «Илоқ давлати»нинг тарихий аҳамияти ҳақида тўхталиб ўтдилар. Сўнгра Ўзбекистон халқ шоири Маҳмуд Тоир ва шоир Барот Исроил ўзларининг ватанпарварлик руҳидаги шеърлари билан тадбирга ўзгача файз бағишладилар.

Фестиваль доирасида вилоятнинг турли туман ва шаҳарларидан келган энг сара фольклор-этнографик жамоалари ўз дастурларини намойиш этдилар.

Айниқса, Ўзбекистон жанг санъати федерацияси спортчилари томонидан намойиш этилган Темурийлар даври жанг санъати (пичоқ, қилич ва найза билан ишлаш усуллари) ҳамда Юқоричирчиқ тумани дорбозлар гуруҳининг хавфли ва маҳоратли чиқишлари йиғилганларда катта таассурот қолдирди.

Фестиваль майдонида туризм, ҳунармандчилик ва миллий либослар кўргазмалари ташкил этилди. Унда вилоят ҳунармандларининг қўл меҳнати маҳсулотлари намойиш этилди.

Тадбир якунида фестиваль ташкилотчилари томонидан фаол иштирок этган Тошкент вилояти ҳунармандлари ва фольклор дасталари эсдалик совғалари ва махсус мукофотлар билан тақдирландилар.