Олий Мажлис Қонунчилик палатасидаги «Миллий тикланиш» демократик партияси фракцияси йиғилишида «Келиб чиқиш жой номлари ва географик кўрсаткичлар тўғрисидаги Лиссабон битимининг Женева актига (Женева, 2015 йил 20 май) Ўзбекистон Республикасининг қўшилиши ҳақида»ги қонун лойиҳаси муҳокама қилинди.

Сўнгги йилларда Ўзбекистон Жаҳон савдо ташкилотига аъзо бўлиш йўлида кўплаб халқаро шартномаларга қўшиляпти. Женева акти ҳам ана шундай ҳужжатлардан бири бўлиб, у орқали товар келиб чиққан жой номлари ва географик кўрсаткичлар Бутунжаҳон интеллектуал мулк ташкилоти доирасидаги ягона қоидалар асосида муҳофаза қилинади.

Географик кўрсаткичлар халқаро амалиётда кенг тарқалган бўлиб, биргина Европа Иттифоқи давлатларида 3000 дан ортиқ географик кўрсаткичлар ва товар келиб чиққан жой номлари рўйхатдан ўтказилган.

Ташаббускорлар Ўзбекистоннинг ушбу ҳужжатга қўшилиш зарурати ҳақида тўхталиб, бу дунёга очилаётган Ўзбекистоннинг туризм салоҳиятини янада кенгайтиришга, айниқса, географик номлар билан боғлиқ ҳудудий брендлар машҳурлигини оширишда муҳим аҳамиятга эга бўлишини таъкидлади. Женева акти эса айнан бундай муносабатларни халқаро миқёсда тартибга солади. Яъни, Ўзбекистоннинг жой номлари билан боғлиқ миллий маҳсулотлари Женева акти орқали халқаро миқёсда ҳуқуқий жиҳатдан ҳимоя қилинади. Бугунги кунда ушбу тизимдан 1060 та товар рўйхатдан ўтказилган.

Депутатлар томонидан қайд этилишича, эндиликда Женева актига қўшилиш орқали маълум бир ҳудудга хос, айниқса, қишлоқ хўжалиги ва ҳунармандчиликка оид маҳсулотларимизни халқаро даражада ҳам оммалаштириш имкониятига эга бўламиз. Бу минтақавий брендларни ривожлантириш, бозор муносабатларини яхшилашга хизмат қилади.

Фракция аъзоси Нодир Тилаволдиев Ўзбекистоннинг деярли барча ҳудудларида географик кўрсаткичлар сифатида рўйхатдан ўтказилиши мумкин бўлган ноёб маҳсулотлар кўплигини таъкидлаб, Ўзбекистоннинг Женева актига қўшилиши, шубҳасиз, ҳудудларга сайёҳлар оқимининг кўпайишига, «гастрономик туризм» ривожланишига, айниқса, Ўзбекистоннинг халқаро майдондаги имижини янада яхшиланишига хизмат қилишини таъкидлади.