Сурхондарё вилоятида ўтказилаётган «Саломатлик марафони — 2026» тадбирлари аҳоли ўртасида соғлом турмуш тарзини қарор топтириш, жисмоний фаолликни ошириш ҳамда тиббий маданиятни юксалтиришга хизмат қилмоқда.

Марафон доирасида оммавий спорт тадбирлари билан бир қаторда аҳоли учун бепул тиббий кўриклар ҳам ташкил этилмоқда. Бу эса фуқароларга ўз саломатлигини текширтириш, касалликларни эрта босқичда аниқлаш ва малакали шифокорлардан зарур тавсиялар олиш имконини бермоқда.

Тиббиёт мутахассисларининг таъкидлашича, айрим касалликлар дастлабки босқичларда сезиларли аломатларсиз кечади. Шу боис мунтазам профилактик кўриклардан ўтиш инсон саломатлигини сақлаш ва касалликларнинг олдини олишда муҳим аҳамият касб этади.

— Ушбу тадбир доирасида ташкил этилган тиббий кўрикда ўзим ҳам, фарзандим ҳам қатнашдик, — дейди Термиз шаҳар Маданият маҳалласида яшовчи Нигора Абдуллаева. — Шифокорлар томонидан саломатлигимиз атрофлича текширилди, зарур тавсиялар берилди. Айниқса, соғлом овқатланиш, жисмоний фаолликни кундалик ҳаёт тарзига айлантириш ва касалликларнинг олдини олиш бўйича берилган маслаҳатлар биз учун жуда фойдали бўлди. Бундай тадбирлар аҳоли саломатлигини мустаҳкамлашда муҳим аҳамиятга эга, деб ўйлайман.

Бугунги кунда «Саломатлик марафони — 2026» вилоятнинг турли ҳудудларидан келган юртдошларимизни соғлом ва фаол ҳаёт тарзи сари бирлаштирмоқда. Бу каби ташаббуслар нафақат аҳоли саломатлигини мустаҳкамлаш, балки жамиятда соғлом турмуш маданиятини кенг қарор топтиришда ҳам муҳим аҳамиятга эга.

Фарҳод ЭСОНОВ, «Халқ сўзи».