Германиянинг «Рейнметалл» мудофаа концерни Руминия билан умумий қиймати 5,7 миллиард евро бўлган йирик ҳарбий-техникавий шартнома имзолади. Бу ҳақида BILD нашри хабар берди.

Шартномага кўра, НАТО ва Европа Иттифоқи аъзоси бўлган Руминия мазкур шартнома доирасида қарийб 300 та «Линкс» пиёдаларнинг жанговар машинаси, ҳаво мудофааси тизимлари, ўқ-дорилар, уларни ишлаб чиқариш учун зарур бутловчи қисмлар ҳамда тўртта ҳарбий кема харид қилади.

Шартнома шартларига кўра, маҳсулотларни етказиб бериш ишлари 2028 йилда бошланиб, 2030 йилга қадар тўлиқ якунланиши режалаштирилган.

«Рейнметалл» компанияси ишларининг асосий қисми маҳаллий корхоналарда амалга оширилишини билдириб, келгусида Руминиядаги ишлаб чиқариш қувватларини сезиларли даражада кенгайтириш ниятида эканини билдирган.

«Рейнметалл» бош директори Армин Паппергер ушбу келишувни компания учун «муҳим ютуқ» деб баҳолаган. Унинг таъкидлашича, мазкур буюртма Россиянинг Украинага қарши кенг кўламли уруши бошланганидан кейин Европа мамлакатларида қурол-яроғ ва ҳарбий техникага бўлган талаб жадал суръатларда ортиб бораётганини яна бир бор намоён этади.

Таҳлилчилар «Рейнметалл» ҳамда Руминия ўртасидаги мазкур харид келишуви компаниянинг сўнгги йиллардаги энг йирик халқаро буюртмаси сифатида баҳоланяпти.