Бугун юртимизда ёшлар бандлигини таъминлаш, уларни тадбиркорлик, ахборот технологиялари, хизмат кўрсатиш ва қишлоқ хўжалиги соҳаларига кенг жалб этиш давлат сиёсатининг устувор йўналишларидан бирига айланди. Бу борада Жиззах вилоятининг Арнасой туманида ҳам ибратли ишлар амалга оширилмоқда.

Хусусан, туманда истиқомат қилувчи 421 нафар уюшмаган ва ишсиз ёшларнинг бандлигини таъминлаш ҳамда уларнинг доимий даромад манбаини яратиш мақсадида жами 390 гектар ер майдони ажратиб берилган эди. Бугунги кунда мазкур майдонларда ёшларнинг меҳнати эвазига етиштирилган ғалла ҳосили уюшқоқлик билан йиғиб олинмоқда.

— Давлатимиз раҳбари томонидан ёшларга ер ажратиб бериш ташаббуси илгари сурилганда, дастлаб кўпчиликда «Ёшлар ер тилини биладими, уддалай оладими?» деган саволлар туғилгани бор гап, — дейди Ёшлар ишлари агентлиги Арнасой туман бўлими раҳбари Дилшод Нишонов. — Лекин бугун арнасойлик ёшлар ўз меҳнати билан бу ишончни тўлиқ оқламоқда, бошоқли дон экинлари билан бир қаторда тарвуз, қовун, беда ҳамда бошқа харидоргир қишлоқ хўжалиги экинлари ҳам юқори агротехник талаблар асосида парваришланмоқда ва улар илк даромадларини ҳам қўлга киритишни бошлашди.

Айни кунларда арпа ва ғалладан бўшаган майдонларни намини қочирмаслик учун пешма-пеш шудгорлаб, сув тежовчи технологияларни қўллаган ҳолда, такрорий экин сифатида мош экиш ишлари олиб борилмоқда. Бу эса бир ердан йил давомида икки, уч марта ҳосил олиш, ернинг унумдорлигини сақлаш ва ёшлар учун қўшимча даромад манбаини яратиш имконини бермоқда.

Толибжон ЭРГАШЕВ, «Халқ сўзи».