Fitch Ratings Ўзбекистоннинг кредит рейтинги (Long-Term Issuer Default Rating (IDR) — қарз мажбуриятларини бажариш қобилиятини баҳоловчи рейтинг) бўйича кўрсаткичини «барқарор»дан «ижобий»га оширди ва рейтингни «BB» даражасида тасдиқлади.

Агентлик бу қарорни мамлакатда иқтисодий ислоҳотларнинг изчил давом этаётгани, макроиқтисодий барқарорликни сақлашга қаратилган сиёсат ҳамда ўрта муддатли истиқболда кучли иқтисодий ўсиш кутилмалари билан изоҳлаган.

Fitch баҳосига кўра, Ўзбекистоннинг паст давлат қарзи, катта ташқи захиралари ва юқори ўсиш салоҳияти рейтингнинг асосий кучли жиҳатлари бўлиб қолмоқда. Таъкидланишича, мамлакатда хусусийлаштириш ва давлат иштирокидаги корхоналар (SOE) фаолиятини ислоҳ қилиш жараёни давом этаётмоқда.

2021–2025 йилларда тахминан 5,1 миллиард долларлик давлат активлари хусусийлаштирилган бўлиб, шундан 1,6 миллиард доллари 2025 йил ҳиссасига тўғри келган. Шунингдек, айрим йирик давлат корхоналари улушларини бирлаштирган National Investment Fund жорий йил май ойида халқаро капитал бозорларида листинг қилинди.

Fitch маълумотига кўра, энергетика ва газ субсидиялари 2023 йилдаги ЯИМнинг 1,4 фоизидан 2026 йилда 0,3 фоизигача қисқариши кутилмоқда. Ўзбекистон иқтисодиётининг ўсиши 2026 йилда 6 фоизни, 2027–2028 йилларда эса ўртача 6,4 фоизни ташкил этишини прогноз қилинган.

Давлат бюджети тақчиллиги 2025 йилда ЯИМнинг 2,1 фоизини ташкил этиб, белгиланган 3 фоизлик лимитдан паст бўлди. Бу ҳолат солиқ тушумларининг кутилганидан юқори бўлиши ва олтин нархларининг ўсиши билан изоҳланган. Агентлик давлат қарзининг ЯИМга нисбати 2027–2028 йилларда 28 фоизгача пасайишини кутмоқда. Бу кўрсаткич «BB» рейтингига эга давлатлар учун ўртача 53 фоизлик даражадан анча паст ҳисобланади.

Ҳисоботда, шунингдек, инфляциянинг пасайиб бораётгани ҳам қайд этилган. Марказий банк 2025 йил март ойидан буён асосий ставкани 14 фоиз даражасида сақлаб келмоқда. Апрель ойидаги йиллик инфляция 7 фоизни ташкил этган. Депозитлар долларлашуви эса 2020 йил бошидаги қарийб 40 фоиздан 2026 йил февраль ойида 21 фоизга тушган. Fitch прогнозига кўра, мамлакатнинг FX reserves ҳажми 2025 йилдаги 66 миллиард доллардан 2026 йилда 71 миллиард долларгача ошади.

Шу билан бирга, агентлик Ўзбекистон иқтисодиётининг хомашё экспортига юқори даражада боғлиқлиги сақланиб қолаётганини таъкидлади. 2025 йилда олтин мамлакат товар экспортининг 41 фоизини ташкил этган. Fitch маълумотларига кўра, мамлакат бошқаруви сифати, ҳуқуқ устуворлиги ва коррупцияни назорат қилиш бўйича World Bank Governance Indicators (WBGI) рейтингининг 33-перцентилида жойлашган.

Бундан ташқари, агентлик ислоҳотларнинг барқарор давом этиши, давлат молияси бошқарувининг янада мустаҳкамланиши ва бошқарув стандартларининг яхшиланиши келажакда рейтингнинг янада ошишига хизмат қилиши мумкинлигини қайд этган.