Дунёнинг етакчи вирусологларидан бири Винсент Мюнстер ва тадқиқотчи Клод Кве Африкадан АҚШга биологик намуналарни ноқонуний тарзда олиб киришда гумон қилиняпти. Бу ҳақида BILD нашри хабар берди.

Маълум қилинишича, жорий йилнинг январь ойида 53 ёшли Винсент Мюнстер ва 38 ёшли Клод Кве «Детройт» аэропортига етиб келганидан сўнг чегара назорати ходимлари томонидан сўроқ қилинган. Уларнинг багажини текшириш жараёнида диагностик ускуналар ўрнига кўпикли қутиларга жойланган 113 та намуна флаконлари топилган.

Федерал қидирув бюроси терговига кўра, ушбу флаконларнинг 17 тасида инактивация қилинган маймунчечак вируси, биттасида сувчечак-зостер вируси, иккитасида эса инсон ДНК намуналари мавжуд бўлган. Ҳозиргача 113 та флакондан фақат 20 таси таҳлил қилинган.

Билдирилишича, голландиялик Винсент Мюнстер АҚШнинг Монтана штатидаги нуфузли Рокки тоғ лабораториясида вирус экологияси бўйича тадқиқот гуруҳига раҳбарлик қилади. У «Ebola», «MERS», грипп ва «SARS-CoV-2» каби вируслар бўйича қатор илмий ишлари билан танилган. Коронавирус пандемияси даврида эса халқаро миқёсдаги етакчи мутахассислардан бири бўлган. Иккинчи гумонланувчи Клод Кве эса унинг тадқиқот жамоасида ишлаган.

АҚШ адлия вазирлиги ушбу шахсларни биологик намуналарни ноқонуний тарзда импорт қилиш ва расмийларга ёлғон маълумот беришда айбламоқда. Терговчилар ҳозирча намуналар нима сабабдан белгиланган тартибда расмийлаштирилмаганини аниқлашга киришган.