Яқин йилларгача фақат вилоят маркази бўлган Фарғона шаҳри ва Қўқон шаҳрида гемодиализ марказлари фаолият кўрсатиши натижасида беморлар узоқ навбат кутишига ёки пойтахтга бориб муолажалар олишга мажбур бўлар эди.

Бугунги кунда бу каби замонавий мажмуалар вилоятнинг деярли барча шаҳар-туманларида ташкил этилди. Эндиликда буйрак етишмовчилиги сингари сурункали касалликлар билан хасталанган беморлар ўз яшаш манзилида белгиланган муддатда ва ҳеч бир қийинчиликсиз даволаниш имконига эга.

Айни кунларда Фарғона вилояти ҳокими Хайрулло Бозоров бошчилигидаги делегация Малайзияда бўлиб турибди. Эътиборлиси, ташриф доирасида тиббиёт йўналишида ҳам истиқболли келишувларга эришилди. Хусусан, вилоят делегациясининг Каула-Лумпур шаҳрида «Orion Consortium Sdn. Bhd» компанияси тасарруфидаги диализ маркази фаолияти билан танишишиши асносида бу борада ўзаро ҳамкорлик қилиш бўйича келишиб олинди.

— Яқин истиқболда вилоятнинг барча ҳудудларида замонавий диализ марказларини ташкил этиш режалаштирилган, — дейди Фарғона вилояти соғлиқни сақлаш бошқармаси бошлиғи Бобур Примқулов. — Шу боис бугунги кунда мазкур йўналишда илғор тажрибаларни ўрганиш ва хорижий ҳамкорлар билан алоқаларни мустаҳкамлашга жиддий эътибор қаратилмоқда.

Юзма-юз мулоқотда компания раҳбари Суюб Аҳмад билан Фарғона вилоятида гемодиализ хизматларини ташкил этиш ва инвестиция лойиҳаларини амалга ошириш масалалари муҳокама қилинди. Учрашув якунида давлат-хусусий шериклик (ДХШ) тамойиллари асосида Фарғона вилоятида гемодиализ марказлари фаолиятини йўлга қўйиш бўйича меморандум имзоланди.

Лойиҳа доирасида энг сўнгги русумдаги ускуналар билан жиҳозланган, халқаро стандартларга мос гемодиализ марказларини барпо этиш, буйрак касаллиги билан оғриган беморларга сифатли ва ихтисослашган тиббий хизмат кўрсатиш имкониятларини янада кенгайтириш мақсад қилинган.

Айтиш жоиз, мазкур компания гемодиализ хизматлари, фармацевтика ҳамда бирламчи тиббий ёрдам кўрсатиш соҳаларига ихтисослашган бўлиб, Малайзия бўйлаб 40 та замонавий диализ марказини бир тизимда бирлаштирган.

Ботир МАДИЁРОВ, «Халқ сўзи».