Бўзатов туманида сўнгги йилларда аҳоли турмуш шароитини яхшилаш, муҳандислик-коммуникация инфратузилмасини ривожлантиришга қаратилган кенг кўламли ишлар амалга оширилиб, кўплаб янги иншоотлар қурилиб фойдаланишга топширилмоқда. Ана шундай муҳим лойиҳалардан бири сифатида бугун туманда сув таъминотини янада яхшилашга хизмат қиладиган замонавий насос станциясининг тантанали равишда ишга туширилиши алоҳида аҳамият касб этади.

Президентимизнинг тегишли қарорига мувофиқ, Амударёнинг Бўзатов тумани ҳудудидан ўтувчи қисмида секундига 3 метр куб сув чиқариш қувватига эга насос агрегатларини ўрнатиш лойиҳаси давлат дастурларига киритилиб, «Ворис Чина» масъулияти чекланган жамияти томонидан қурилиш ишлари тўлиқ якунланди.

Янги барпо этилган замонавий насос станциясининг тантанали очилиш маросими бўлиб ўтди. Тадбирда Сув хўжалиги вазирлиги, туман ҳокимлиги масъуллари, нуронийлар, фермерлар ва маҳалла фаоллари иштирок этди.

Тадбирда Бўзатов тумани ҳокими Б.Уббиниязов, «Сувхўжаликназорат» инспекцияси бошлиғининг ўринбосари З.Ирисбоев сўзга чиқишди ушбу лойиҳанинг туманни ҳар томонлама ривожлантиришдаги аҳамиятига тўхталиб ўтдилар.

Таъкидланганидек, тадбир давомида мазкур лойиҳа ҳудуд инфратузилмасини янада ривожлантириш, санитария ҳолатини яхшилаш ҳамда аҳоли учун қулай яшаш шароитларини яратишда муҳим ўрин тутиши таъкидланди.

— Лойиҳа доирасида ушбу насос агрегатларининг ўрнатилиши натижасида тумандаги 210 гектар аҳолининг томорқа майдонларида сув таъминоти яхшиланади, — дейди Қорақалпоғистон Республикаси сув хўжалиги вазирининг ўринбосари Т.Мадиреймов. — Шунингдек, 2,8 минг гектар суғориладиган ерлар ҳамда 3,5 минг гектар яйлов майдонларини сув билан таъминлаш имконияти бўлади.

Ушбу ишларга қурилиш бошидан жами 13 млрд 223 млн сўм маблағ сарфланди. Ҳозирда Қорақалпоғистон насос станциялари ва энергетика бошқармаси томонидан агрегатлар соз ҳолатда сақланиб, ҳудуднинг сувга бўлган эҳтиёжини таъминлашга хизмат қилмоқда.

Тадбир якунида рамзий тасма кесилиб, нуронийлар дуоси билан насос агрегатлари ишга туширилди ҳамда иштирокчилар янги барпо этилган насос станцияси фаолияти билан яқиндан танишдилар.

Эътиборлиси, бундай лойиҳалар Бўзатов туманининг ижтимоий-иқтисодий ривожига кучли туртки бериб, аҳоли фаровонлигини ошириш, қишлоқ хўжалиги самарадорлигини юксалтириш ҳамда ҳудудда барқарор сув таъминотини таъминлашда муҳим омил бўлиб хизмат қилади.

Ғайрат ОТАЖОНОВ,«Халқ сўзи».