Эрон Мудофаа вазирлиги расмий вакили генерал Ризо Талаи-ник низо якунланганидан кейин Ҳўрмуз бўғози орқали савдо кемаларининг ҳаракати фақат Ислом Республикаси хавфсизлигига таҳдид солмаган тақдирдагина қайта тикланишини маълум қилди. Унинг сўзларидан ТАСС иқтибос келтирмоқда.

«Уруш тугаганидан кейин савдо флотининг тўсиқсиз ҳаракати Эрон хавфсизлигига таҳдид юзага келмаган тақдирдагина амалга оширилади», — дея таъкидлади у.

Аввалроқ Axios портали Эрон АҚШга Ҳўрмуз бўғозини очиш ва урушни тўхтатишни кўзда тутувчи таклиф юборгани ҳақида хабар берган эди.

Ислом Республикаси Ташқи ишлар вазири Аббос Ароқчи ушбу таклифни 25–26 апрель кунлари Исломободда бўлиб ўтган музокаралар чоғида покистонлик воситачилар орқали етказган.

Тахминларга кўра, ўт очишни тўхтатиш тартиби узоқ муддатга узайтирилади ёки томонлар урушни узил-кесил якунлаш бўйича келишувга эришадилар.