Аввал хабар қилганимиздек, Самарқандда «Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш» мавзусида халқаро форум бўлиб ўтмоқда.

Унинг доирасида бугун Бирлашган Миллатлар Ташкилотининг ёшлар тармоғи вакиллари билан тарихда илк бор «Наркотаҳдидларга қарши курашиш бўйича халқаро ёшлар саммити» бўлиб ўтяпти. Саммитда Марказий Осиё давлатларидан минг нафарга яқин фаол ёшлар офлайн ва онлайн тарзда қатнашмоқдалар.

Ёшлар саммитининг асосий мақсади минтақа давлатлари ёшлари орасида гиёҳвандлик воситалари ҳамда психотроп моддалар тарқалишининг олдини олиш, наркожиноятларга қарши муросасиз курашни давом эттириш, ёшлар орасида соғлом турмуш тарзини тарғиб қилишдан иборат.

Тадбирда ҳар бир давлатнинг ёшлари ўзлари томонидан олиб борилаётган лойиҳалар ҳақида фикр алмашиб, ўсиб келаётган минтақа ёшларини бу иллатдан ҳимоя қилишнинг янги самарали усулларини амалиётга жорий қилиш масалаларини муҳокама қилмоқдалар.

Шунингдек, наркотик воситалар ноқонуний айланмасининг глобал ва минтақавий тенденсиялари, ёшлар ва вояга етмаганлар ўртасида профилактика тизимини такомиллаштириш, даволаш, реабилитация ва ижтимоий реинтеграция жараёнларини ривожлантириш, рақамли технологиялар ҳамда сунъий интеллектдан самарали фойдаланиш масалалари ҳам атрофлича кўриб чиқилмоқда.

Саммит якунида Марказий Осиё ёшлари томонидан минтақа давлатларининг соҳага оид фаолиятни олиб бораётган расмийларига йўлланган «Ёшлар мурожаати» қабул қилинади.

Халқаро форум якунида эса «Трансмиллий наркотаҳдидларга қарши кураш: жамоат саломатлиги ва хавфсизлиги» бўйича Самарқанд Декларацияси қабул қилинади.

Абдулазиз ЙЎЛДОШЕВ, «Халқ сўзи».