Бувайда туманидаги Жийдали маҳалласида халқимиз жуда ҳам ардоқлайдиган мўъжазгина ҳовли бор. Файзли гўшага қадам босишингиз билан мумтоз наволар оҳангига маҳлиё бўласиз. Оддий ёғочдан тайёрланган бетакрор ва беназир чолғу асбоблари устанинг меҳнатига тасанно айтаётгандек гўё. Ҳар қандай меҳмонни куй сеҳрига мафтун қиладиган ушбу хонадонда ардоқли санъаткоримиз Расулқори Мамадалиев умргузаронлик қилган. Бугун отамерос уй чироғи доим ёниқ. Бу вазифани ҳофизнинг фарзанди – соз ясовчи уста Муҳаммадсодиқ Мамадалиев шараф билан уддалаяпти.

Уста Муҳаммадсодиқ ака яшаётган бу хонадон санъат аҳли ва шинавандалар учун бегона эмас. Шарқона нақшлар билан безатилган ҳовлидаги ҳар бир буюмга, ҳар бир устунга халқимизнинг машҳур шоир ва ёзувчилари, созандаю хонанда, аскиячиларининг нафаси теккан. Муҳаммадсодиқ ака ҳам болалигидан сўз ва соз сеҳрига ошиқ бўлиб улғайди. Қўшиқ куйлади, рубоб, танбур, дутор ва ғижжак сингари миллий чолғу асбобларини ясаш сирларини ўрганди.

—Дадамнинг кўзлари ожиз бўлгани учун дунёни сизларнинг кўзларинг орқали кўраман, сизлар ҳунарли бўлиб элга нафингиз тегса, шунинг ўзи мен учун катта бахт деб кўп такрорлардилар,—дейди маҳоратли уста.—Отам ўгитларига амал қилиб, бир муддат мактабда мусиқа фанидан дарс бердим, чорак асрдирки, ўғилларим ва шогирдларим билан соз ясаш йўналишда фаолият кўрсатиб келмоқдамиз. Бу ерда юртимизнинг машҳур ҳофиз ва созандаларига рубоб, танбур, дутор каби чолғу буюмлари тайёрлаб берилади. Маданият муассасалари, мусиқа ва санъат мактаблари маҳсулотларимизнинг асосий харидори ҳисобланади. Меҳнат ва изланишларимиз юксак қадрланиб, 2021 йили давлатимиз раҳбари фармонига кўра “Шуҳрат” медали билан тақдирландим.

Айтганча, моҳир уста тайёрлаган рубоб ва бошқа миллий чолғу анжомлари Япония, АҚШгача етиб борган. Шунингдек, Марказий Осиё давлатлари ижодкорлари ушбу маҳсулотларга энг кўп буюртма беради.

Бундан илҳомланган уста яқин йилларда “Наврўз” деб номланган миллий мусиқа анжомларининг янги турларини яратди. Унда анъанавий парда ўрнида тутдан тайёрланган тахталардан фойдаланилади. Бу ҳар қандай об-ҳаво шароитида мусиқа асбобларидан самарали фойдаланиш имконини бериши билан аҳамиятли.

—Президентимизнинг “Мамлакатимизда маданият, санъат ва адабиёт соҳаларини ривожлантиришга улкан ҳисса қўшган бир гуруҳ марҳум ижодкорларни мукофотлаш тўғрисида”ги фармонини кўзда ёш билан ўқидим,—дейди хонадон соҳиби.—Фармонга мувофиқ, отам — Расулқори Мамадалиев “Дўстлик” ордени билан мукофотланибди. Эрталаб устахонада шогирдлар билан ишлаб ўтирсак, Олий Мажлис Сенати раиси Танзила Норбоева Фарғона вилояти ҳокимлиги масъуллари ҳамда туманимиз фаоллари ҳамроҳлигида хонадонимизга кириб келишди. Мукофотни қабул қилиб олиш асносида самимий суҳбатлашдик, меҳмонлар отамнинг уй-музейи экспонатлари билан танишишди.

Расулқори Мамадалиев ўз санъати билан нафақат Ўзбекистон, балки Марказий Осиё, узоқ ва яқин давлатларда яшовчи халқлар ўртасида ҳам машҳур ва манзур ҳофиз бўлган. Унинг ҳеч кимда бўлмаган ўткир ва ширали овози, мафтункор ижро услуби бор эди. У бир умрлик жўровози Камолиддин Ҳамроқулов билан ўнлаб дурдона ва ўлмас асарлар ижод қилди ва халққа армуғон этди. Унинг жўровозликда ижро этган 18 та қўшиғи Ўзбекистон радиосининг олтин фондидан жой олган ва ҳамон мухлислар томонидан севиб тингланади.

Расулқори ота ва унинг ижоди ҳақида кўп ёзиш мумкин. У Бувайда туманида маданият ва санъатни ривожлантиришга катта ҳисса қўшди. Туман Маданият уйи қошидаги “Табассум” ашула ва рақс ансамблининг ижодий парвозида унинг беминнат хизматлари бор. Кейинчалик ташкил топган Бувайда тумани “Мақомчилар ансамбли” ҳам ҳақли равишда Расулқори Мамадалиев номи билан боғлиқ.

Унинг ижросида “Шашмақом”нинг жуда кўп йўналишидаги умрбоқий тароналар, халқ анъанавий ижро йўлидаги “Ушшоқ”, “Тановор”, “Насруллойи”, “Насри уззол”, “Гиря”, “Бебоҳча”, “Бозургон”, “Мудийн”, “На қилдим”, “Айладинг кетдинг” ва бошқа қўшиқлар мумтоз санъатимиз дурдоналари қаторидан ўрин эгаллаган.

Расулқори Мамадалиев вафотидан сўнг “Дўстлик” ордени билан тақдирланиши буюк санъаткор истеъдодига берилган юксак баҳодир.

Ботир МАДИЁРОВ

(“Халқ сўзи”).