Ўзбекистон давлат консерваторияси Нукус филиали ташкил топганига 5 йил тўлди. Шу муносабат билан куни кеча Нукус шаҳрида жойлашган Бердақ номидаги Қорақалпоқ давлат академик мусиқали театрида ҳисобот концерти юқори савияда ташкил этилди.

Қўшиқлар Қорақалпоғистонда хизмат кўрсатган артист, «Шуҳрат» медали соҳиби, Ўзбекистон давлат консерваторияси Нукус филиали директори, профессор Рудакий Алланбаев ва филиалнинг иқтидорли талаба-ёшларидан ташкил топган Халқ чолғулари оркестри, Симфоник оркестр ва Халқ чолғулари ансамбли билан биргаликда жонли овозда ижро этилди.

Шунингдек, концертда Ўзбекистон халқ артисти Айгул Надирова ва Рудакий Алланбаевнинг иқтидорли шогирдлари томонидан турли жанрлардаги асарлар юксак маҳорат билан ижро этилди.

Концерт давомида юртимизнинг таниқли устоз санъаткорлари томонидан филиал фаолияти ва эришилган ютуқлари бўйича илиқ ҳамда самимий фикрларини билдирди.

Маълумот ўрнида, Ўзбекистон Республикаси Вазирлар Маҳкамасининг 2021 йил 5 апрель кунги 186-сонли қарори асосида Қорақалпоғистонда Ўзбекистон давлат консерваториясининг Нукус филиали ташкил этилган бўлиб, Республика санъатининг ривожланишига катта ҳисса қўшиб келмоқда.

Филиал ташкиллаштирилган кундан бугунги кунга қадар филиалда маънавий- маърифий ва илмий соҳаларда бир қанча ютуқларга эришиб келмоқда.

Ўзбекистон давлат консерваторияси Нукус филиали бир нечта хорижий давлатларнинг олий таълим муассасалари билан ҳамкорлик шартномаларини имзолашга эришди. Хусусан, ҳозирда Қозоғистон Республикасида жойлашган Қурманғози номидаги Қозоқ миллий консерваторияси, Т.Саттаров номидаги Тожикистон миллий консерваторияси ва Мирзо Турсунзода номидаги Тожикистон давлат санъат ва маданият институти, Италия давлатининг L’Aquila шаҳридаги «ALFREDO CASELLA» консерваторияси, Хитой халқ Республикасидаги Ухан мусиқий консерваторияси билан ҳамкорлик алоқаларини олиб бормоқда.

Шунингдек филиалда таҳсил олаётган иқтидорли талабалар республика ва халқаро танловларда фаол иштирок этиб, совринли ўринларни эгаллаб келишмоқда.

Шу кунга қадар филиал профессор-ўқитувчилари томонидан 9 та дарслик, 30 та ўқув-услубий қўлланма, 15 та монография нашр қилинди.

Филиал ташкиллаштирилган йили 47 нафар талаба ўқишга қабул қилинган бўлса, ҳозирда талабалар сони 247 нафарни ташкил этмоқда. 2025 йилда илк битирувчилар ўқишни муваффақиятли якунлаб, шулардан 10 нафари магистратурага қабул қилинди.

Ўзбекистон давлат консерваторияси Нукус филиали 2025/2026 ўқув йилини янги бинода фаолиятини бошлади. 2025 йилнинг 30 сентябрь куни филиал янги биносининг очилиш маросими тантанали равишда бўлиб ўтди. Филиалнинг янги биноси 300 ўринга мўлжалланган бўлиб, талабаларнинг билим олишлари учун барча шароитлар яратилган.