Жиноят кодексида вояга етмаганларга нисбатан жинсий эркинликка қарши жиноятлар ҳамда улар билан жинсий алоқа қилиш ва уятсиз-бузуқ ҳаракатларни содир этиш билан боғлиқ жиноятлар учун муқаддам судланган шахслар қуйидаги жиноятларни содир этганда уларга тегишинча умрбод озодликдан маҳрум қилиш ёки узоқ муддатли озодликдан маҳрум қилиш жазосини белгиланади:

— ўн тўрт ёшга тўлмаган шахснинг номусига тегиш;

— ўн тўрт ёшга тўлмаган шахсга нисбатан жинсий эҳтиёжни зўрлик ишлатиб ғайритабиий усулда қондириш;

— ўн олти ёшга тўлмаган шахсга нисбатан уятсиз-бузуқ ҳаракатларни бир гуруҳ шахслар томонидан содир этганлик учун оғирроқ жавобгарликни белгилаш, шунингдек, тергов ва суд амалиётидан келиб чиққан ҳолда Жиноят кодекси 129-моддаси диспозициясига аниқлик киритиш.

Президент фармонининг бу банди вояга етмаган болаларни ҳимоя қилиш йўлидаги қатъий қадамдир. Уларга нисбатан жинсий жиноят содир этган ва аввал ҳам судланган шахсларга нисбатан умрбод ёки узоқ муддатли озодликдан маҳрум қилиш жазосининг жорий этилиши адолат тамойилларини мустаҳкамлайди, жазонинг муқаррарлигини таъминлайди ҳамда бундай жиноятларнинг олдини олишда кучли тўсиқ бўлиб хизмат қилади.