Жорий йилнинг 21 апрель куни «Марказий Осиё ва Озарбайжон аёллари: устувор вазифалар ва қўшма ҳаракатлар» мавзусида Ўзбекистон раислигида Марказий Осиё мамлакатлари ва Озарбайжон етакчи аёллари мулоқотининг биринчи мажлиси онлайн шаклда бўлиб ўтди.

Тадбирда Марказий Осиё мамлакатлари ва Озарбайжон парламентлари вакиллари, шунингдек, халқаро ташкилотлар, шу жумладан Бирлашган Миллатлар Ташкилотининг минтақавий тузилмалари раҳбарлари иштирок этди.

Олий Мажлис Сенати Раиси Танзила Нарбаева тадбирни очиб берар экан, Мулоқотнинг халқаро майдондаги нуфузи изчил ортиб бораётганини, у конструктив мулоқот, илғор тажриба алмашиш ва қўшма ташаббусларни илгари суриш учун муҳим платформага айланганини таъкидлади. Шунингдек, Мулоқот доирасида бугунга қадар 20 га яқин муҳим ҳужжат қабул қилингани ва қатор амалий ташаббуслар илгари сурилгани қайд этилди.

Маълумот ўрнида айтиш жоизки, Марказий Осиё мамлакатлари етакчи аёллари мулоқотига 2020 йил декабрь ойида Ўзбекистон ташаббуси билан асос солинган. 2021 йилда мазкур платформага Ўзбекистон раислик қилган. Сўнгги беш йилда Марказий Осиёнинг барча давлатларида Мулоқот мажлислари ўтказилиб, долзарб масалалар муҳокама қилинди. Жорий йилда эса Мулоқотга Ўзбекистон яна раислик қилади.

Шунингдек, Марказий Осиё давлатлари раҳбарларининг еттинчи Маслаҳат учрашуви саммитида Озарбайжон Республикаси Президенти Илҳом Алиевнинг иштирок этгани қайд этилди. Бу эса Марказий Осиё етакчи аёллари мулоқотига Озарбайжоннинг қўшилиши учун муҳим омил бўлди.

Тадбирда йил давомида Ўзбекистон раислиги доирасида амалга ошириладиган устувор вазифалар атрофлича муҳокама қилинди.

Хусусан, анжуман доирасида тадбиркор аёллар ўртасидаги мулоқотни фаоллаштириш, бизнес-форумлар ташкил этиш, аъзо давлатларда хотин-қизларнинг ҳуқуқ ва манфаатларини ҳимоя қилишга қаратилган қонунчилик амалиёти билан ўзаро ўртоқлашиш, шунингдек, парламентлар, ҳукуматлар ва фуқаролик жамияти институтлари ўртасида самарали тажриба алмашинувини йўлга қўйиш масалаларига алоҳида эътибор қаратилди.

Жумладан, май ойида Бухоро шаҳрида ўтказиладиган Осиё хотин-қизлари иккинчи форуми доирасида «Илм-фанда аёллар етакчилиги» мавзусида анжуман ташкил этиш назарда тутилган. Ушбу анжуман давомида Марказий Осиё мамлакатлари ҳамда Озарбайжон аёл-олимлари ўртасида илмий ҳамкорлик ва мулоқот платформасини шакллантириш, шунингдек, қўшма илмий-тадқиқот лойиҳалари ҳамда инновацион ташаббусларни амалга ошириш масалалари кўриб чиқилади.

Шу билан бирга, Самарқанд шаҳрида ташкил этиладиган Ёш парламент аъзоларининг 12-глобал форуми доирасида ёш хотин-қизларнинг ижтимоий, иқтисодий ва сиёсий имкониятларини кенгайтиришга қаратилган тадбирлар ҳамда Мулоқот мажлисларини ўтказиш масалаларига алоҳида эътибор қаратилди.

Шунингдек, халқаро ҳамкорликни янада ривожлантириш, илғор тажриба алмашинувини фаоллаштириш ва йил якунида Мулоқот фаолияти натижаларини сарҳисоб қилиш бўйича муҳим йўналишлар белгилаб олинди.

Мажлис иштирокчилари минтақавий ҳамкорликни, ўзаро ишонч ва бирдамликни мустаҳкамлаш, шу жумладан халқаро ташкилотлар билан самарали ҳамкорликни давом эттириш лозимлиги ҳақида ўз фикр-мулоҳазаларини билдирди.