Тамаки маҳсулотларининг ноқонуний савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Бош прокуратура ҳузуридаги Департаментнинг Оҳангарон шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Унда муқаддам судланган фуқаро Ж.О. «Файзобод» МФЙ ҳудудидаги омборхонада умумий баҳоси 280,9 млн сўмлик 3 372 дона чет элда ишлаб чиқарилган «Velo» номли тамаки маҳсулотини сотиш мақсадида сақлаб келаётганлиги аниқланиб, ушбу маҳсулотлар ашёвий далил сифатида расмийлаштириб олинган.

Шу каби яна бир ҳолат, Департаментнинг Чилонзор тумани бўлими ходимлари томонидан ўтказилган тезкор тадбирда ҳам аниқланган.

Унга кўра, фуқаролар Э.Н. ва М.Н. тегишли ҳужжатлари бўлмаган жами 242 дона «WАКА» номли электрон тамаки маҳсулотини фуқаро М.Ҳ.га 40 млн сўм ва 1 700 АҚШ долларига сотган вақтида ашёвий далиллар билан қўлга олинган.

Шунингдек, Департаментнинг Олтинкўл тумани бўлими томонидан ўтказилган терговга қадар текширувда тамаки маҳсулотларининг ноқонуний савдоси билан шуғулланиб келган фуқаро И.Р. савдо дўконида чет элда ишлаб чиқарилган 714 қути акциз маркасиз тамаки маҳсулотларини сотувга қўйганлиги аниқланиб, ушбу маҳсулотлар ашёвий далил сифатида расмийлаштирилган.

Ҳозирда мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят ишлари қўзғатилиб, тергов ҳаракатлари олиб борилмоқда.