Сенатнинг Бюджет ва иқтисодий масалалар қўмитаси раиси ўринбосари Кобул Турсунов томонидан электр энергияси таъминотидаги узилишлар юзасидан энергетика вазирига сенатор сўрови юборилди.

Сенатор сўровида мамлакатимизда энергетика соҳасини ривожлантириш, янги қувватларни ишга тушириш ва тармоқларни модернизация қилиш бўйича кенг кўламли ишлар амалга оширилаётгани қайд этилган. Ушбу тадбирлар доирасида республикада электр энергияси ишлаб чиқариш ҳажми сўнгги йилларда кескин ўсиб, 2016 йилдаги 59 млрд кВт/соатдан 2025 йилга келиб 86,7 млрд кВт/соатга етган.

Бироқ мазкур кўрсаткичларга қарамай, жойларда электр энергияси таъминоти барқарорлиги билан боғлиқ айрим тизимли муаммолар сақланиб қолмоқда. Жумладан, узилишлар ва йирик авария ҳолатлари кузатилмоқда. Бу айрим қишлоқ ва чекка ҳудудларда узилишлар ва чекловлар юзага келишига сабаб бўлмоқда.

Шунингдек, сўровда электр таъминотидаги узилишлар айрим тадбиркорлик субъектлари фаолиятига салбий таъсир кўрсатаётгани, бу эса республика иқтисодиётида ҳам маълум оқибатлар келтириб чиқараётгани қайд этилган.

Бундай ҳолат электр энергияси барқарорлигини таъминлаш масаласига комплекс ёндашувни тақозо қилмоқда. Сенатор сўровида таъкидланишича, мазкур йўналишда аниқ режа, шаффоф мониторинг ва масъулиятни кучайтириш орқали аҳоли ва тадбиркорлик субъектларини ишончли ва узлуксиз электр энергияси билан таъминлаш мумкин.

Сенатор «Парламент назорати тўғрисида»ги Қонунга мувофиқ вазирликдан электр таъминоти барқарорлигини таъминлашга тўсқинлик қилаётган тизимли муаммоларни бартараф этиш, жумладан мавжуд электр тармоқларини модернизация қилиш, янги генерация қувватларини ишга тушириш ва қайта тикланувчи энергия манбаларини жорий этиш бўйича олиб борилаётган ишлар тўғрисида маълумот тақдим этишни сўради.

Сўровда, шунингдек, тадбиркорлик субъектлари учун, шу жумладан, саноат зоналарида кафолатланган электр таъминотини яратиш бўйича амалга оширилаётган ишлар самарадорлигини ошириш юзасидан маълумот бериш ҳам сўралди.